ტაილანდის მღვიმიდან ბავშვების გამოყვანის სამაშველო ოპერაცია მაქსიმუმ 20 საათში განახლდება. ამ დროისთვის, ტაილანდის სამხედრო ფლოტის ცნობით, მღვიმიდან 4 ბავშვია გამოყვანილი. ოპერაციის შეჩერების მიზეზი ჟანგბადის მარაგის ამოწურვა გახდა.

ფოტო: EPA

"ჩვენი საქმე არ დაგვისრულებია. ჩვენ შემდეგი ოპერაცია ისევე წარმატებით უნდა განვახორციელოთ, როგორც დღეს", - განაცხადა სამაშველო ოპერაციის ხელმძღვანელმა პრესკონფერენციაზე.

მან შეახსენა საზოგადოებას, რომ გამოქვაბულიდან კიდევ 8 ბავშვი და 25 წლის მწვრთნელია გამოსაყვანი.

მიუხედავად იმისა, რომ როიტერის ცნობით, გამოქვაბული 6-მა ბავშვმა დატოვა, ოფიციალური უწყებების ცნობით, გვირაბიდან მხოლოდ 4 ბიჭია გამოყვანილი. ისინი ჩიანგ რაის საავადყოფოში უსაფრთხოდ რჩებიან. პრესკონფერენციაზე არ დაასახელეს გამოყვანილი ბიჭების ვინაობა და არც ის განმარტეს, რის მიხედვით შეირჩა თანმიმდევრობა.

ფოტო: Getty Images

შაბათ საღამოს დაწყებულმა წვიმამ, რომელიც კვირას გაგრძელდა ტაილანდის ხელისუფლება აიძულა ოპერაცია ნაჩქარევად დაეწყო. მღვიმეში შესვლა ადგილობრივი დროით კვირას, დილის 10 საათზე დაიწყო. სამაშველო ოპერაციაში სულ 13 უცხოელი და 5 ტაილანდელი მყვინთავი მონაწილეობს.

სამაშველო ოპერაცია სრულ სიბნელეში სიარულს, ცოცვას, ცურვას და ყვინთვას გულისხმობს. მაშველებს და ბიჭებს სახეზე სპეციალური ნიღბები უკეთიათ, ასევე თან აქვთ ჟანგბადის ბოთლები. თითოეულ ბიჭს ორი მაშველი აცილებს.

12 ბიჭი და მათი ფეხბურთის მწვრთნელი გამოქვაბულში 23 ივნისს აღმოჩნდნენ და აქამდე იქ არიან. ისინი ტურისტებისთვის კარგად ნაცნობ გამოქვაბულში საფეხბურთო ვარჯიშის შემდეგ მწვრთნელთან ერთად შევიდნენ, თუმცა მუსონური წვიმების გამო წყლის დონემ მოულოდნელად მოიმატა და გარეთ გამოსვლა ვეღარ მოახერხეს.