ხორვატიის საფეხბურთო კავშირმა მსოფლიო ჩემპიონატზე სამწვრთნელო შტაბის წევრი, ოგნენა ვუკოევიჩი გაათავისუფლა, მიზეზი კი "დიდება უკრაინას" ვიდეო გახდა. რუსეთის ნაკრებზე გამარჯვების შემდეგ ვუკოევიჩმა და ფეხბურთელმა, დომაგოი ვიდამ ვიდეორგოლი ჩაწერეს, რომელშიც "დიდება უკრაინას" გაიძახოდნენ და რუსეთზე ხორვატიის გამარჯვება უკრაინის დინამოს მიუძღვნეს.

ვუკოევიჩს ჩამოართვეს ტურნირის აკრედიტაცია და ხორვატიის დელეგაციის შემადგენლობაში აღარ არის. საფეხბურთო კავშირმა ვუკოევიჩის განცხადებაც გაავრცელა.

"ჩემს სიტყვებში არავითარი პოლიტიკური ფონი არ ყოფილა. თუმცა მესმის, რომ ჩემი განცხადების, სამწუხაროდ, სხვანაირად ინტერპრეტირება შეიძლებოდა. ამის გამო ვწუხვარ და ბოდიშს ვუხდი რუს გულშემატკივარს", - ნათქვამია განცხადებაში.

7 ივლისს მსოფლიო ჩემპიონატზე ხორვატიის საფეხბურთო ნაკრებმა მეოთხედფინალში რუსეთის ნაკრები დაამარცხა და ნახევარფინალში გავიდა. მალევე ინტერნეტსივრცეში ვიდეორგოლი გავრცელდა. ორივე, ვიდო და ვუკოევიჩი კიევის დინამოს ყოფილი ფეხბურთელები არიან.

კვირას ცნობილი გახდა, რომ ფიფამ ვიდას დისციპლინარული გაფრთხილება მისცა. ხორვატიის მცველმა ბოდიში მოიხადა და განაცხადა, რომ მისი სიტყვები ინტერპრეტირების მსხვერპლი გახდა.