დღეს, 9 ივლისს ადამიანის უფლებათა დაცვისა და სამოქალაქო ინტეგრაციის კომიტეტში შრომის უსაფრთხოების კანონის აღსრულების მონიტორინგის განხილვა ნახევრად ცარიელ დარბაზში მიმდინარეობდა.

კომიტეტის სხდომის ამსახველი ფოტო ადამიანის უფლებათა სწავლებისა და მონიტორინგის ცენტრის იურისტმა ლინა ღვინიანიძემ გაავრცელა.

სხდომას თავმჯდომარის რანგში უძღვებოდა ქართული ოცნების დეპუტატი, რატი იონათამიშვილი. სიტყვით გამოვიდა შრომის, ჯანმრთელობისა და სოციალური დაცვის მინისტრის მოადგილე თამილა ბარკალაია და ეკონომიკისა და მდგრადი განვითარების მინისტრის მოადგილე, გენადი არველაძე.

ქართული ოცნების საპარლამენტო პრესმდივანმა On.ge-სთან საუბარში განმარტა, რომ ეს არ იყო კომიტეტის სხდომა კლასიკური გაგებით, სადაც კვორუმის არსებობაა აუცილებელი. მისი თქმით, დეპუტატებს სურვილის შესაბამისად შეეძლოთ სხდომაზე დასწრება.