შინაგან საქმეთა მინისტრის მოადგილეს, ნათია მეზვრიშვილს მიაჩნია, რომ ხორავას ქუჩის საქმეზე საგამოძიებო კომისიის მიერ გაცემული რეკომენდაცია, მიხეილ კალანდიას მიმართ სისხლისსამართლებრივი დევნის დაწყებაზე, კომისიის კომპეტენციას სცილდება.

პარლამენტის დროებითმა საგამოძიებო კომისიამ შინაგან საქმეთა სამინისტროს ორი რეკომენდაციით მიმართა. ერთ-ერთი რეკომენდაციით კომისია ითხოვს, რომ დაიწყოს სისხლისსამართლებრივი დევნა მიხეილ კალანდიას მიმართ, დავით სარალიძის ჯგუფურად მკვლელობაში თანამონაწილეობის საქმეზე.

მეზვრიშვილი თქმით, სისხლისსამართლებრივი დევნის დაწყება არა შსს-ს, არამედ პროკურატურის უფლებამოსილებაა. მისივე თქმით, გაუგებარია კომისიის მხრიდან მსგავსი რეკომენდაციის გაცემა, როდესაც საქმესთან შემხებლობაში მყოფი "მნიშვნელოვანი მოწმეების" გამოკითხვა კომისიაში ჯერ არ დასრულებულა.

მინისტრის მოადგილე განმარტავს, რომ გაცემული ორი რეკომენდაციიდან შსს-ს მხოლოდ ერთი ეხება. კერძოდ, კი გ.მ.-ს ცივი იარაღით დაჭრის საქმის გამოძიების დაწყება. მისივე თქმით, საქმესთან დაკავშირებით გამოძიება მიმდინარეობს.

2 ივლისს პარლამენტის დროებითმა საგამოძიებო კომისიამ ხორავას საქმის მოწმეებთან, გამომძიებლებთან, პროკურორთან და დაზარალებულთა ოჯახებთან გასაუბრების შემდეგ გადაწყვეტილება მიიღო და რეკომენდაციებს კენჭი უყარა. კომისიის გადაწყვეტილებით, შინაგან საქმეთა სამინისტროს ორი რეკომენდაციით მიმართეს:

  • დაუყოვნებლივ დაიწყოს გამოძიება გ.მ-ს ცივი იარაღით დაჭრის საქმეზე, ასევე შსს-მ გაატაროს შესაბამისი ოპერატიული და სამძებრო ღონისძიებები დანაშაულის ჩამდენი პირების იდენტიფიცირებისათვის (10 მომხრე და 1 წინააღმდეგი);
  • დაიწყოს სისხლისსამართლებრივი დევნა მ.კ-ს [კალანდია] მიმართ, დავით სარალიძის ჯგუფურად მკვლელობაში თანამონაწილეობის საქმეზე; (8 მომხრე და 6 წინააღმდეგი).

კომისიის სხდომა 3 ივლისს, 3 სააათზე განახლდება. სხდომაზე შინაგან საქმეთა სამინისტროს წარმომადგენლებს, კერძოდ, საქმის დეტექტივებს გაესაუბრებიან.