ევროპული საქართველოს დეპუტატი, ზურაბ ჭიაბერაშვილი საქართველოს პრემიერ-მინისტრის მამუკა ბახტაძის მიერ მცირე მთავრობის კონცეფციას აკრიტიკებს და აცხადებს, რომ როგორც კვირიკაშვილის, ისე ბახტაძის მთავრობა ხარჯების შემცირებას ვერ შეძლებს.

ზურაბ ჭიაბერაშვილის განცხადებით, მამუკა ბახტაძეს მცირე მთავრობის კონცეფცია არასწორად ესმის.

"მცირე მთავრობა არ ნიშნავს ადმინისტრაციული ხარჯის მშპ-სთან შეფარდებას, მცირე მთავრობა არ ნიშნავს ბიუროკრატიის შემცირებას, მცირე მთავრობა არ ნიშნავს სამინისტროების რაოდენობაზე კამათს. მცირე მთავრობა ნიშნავს ნაკლებ გადასახადს, ნაკლებ რეგულირებას, როცა მთავრობა ნაკლებად ერევა ადამიანების ცხოვრებაში, ნაკლებად ერევა ეკონომიკაში", - განაცხადა ზურაბ ჭიაბერაშვილმა.

დეპუტატის თქმით, მამუკა ბახტაძე დამატებით არ განმარტავს რას ნიშნავს სახელმწიფო ხარჯების მთლიან შიდა პროდუქტთან მიმართებით 3,9 პროცენტამდე შემცირებას.

"ადამიანურ ენაზე, ამ რიცხვებით ჟონგლიორობა ნიშნავს ერთ რამეს, რომ წელს მთავრობა არ აპირებს რამე მოიკლოს საკუთარი ჯიბიდან. მომავალ წელს ეს პროცენტი მოიკლებს იმის ხარჯზე, რომ მთავრობა აღარ გაიზრდის საკუთარ პრემიებს და დანამატს, სინამდვილეში გადასახადებია შესამცირებელი და მეორე მხრივ, ბიუჯეტია გადასალაგებელი, რომ უარი ითქვას ბევრ უყაირათო პროგრამაზე", - განაცხადა ზურაბ ჭიაბერაშვილმა პარლამენტის პლენარულ სხდომაზე.

მისი თქმით, ხარჯების შემცირებას პოლიტიკური ნება სჭირდება. "მაშინ თქვენ უნდა გაანაწყენოთ საკუთარი პოლიტიკური აქტივი, უმიზნო და უყაირათო სახელმწიფო პროგრამაზე მიბმული ბიზნესი, რომელიც თქვენ გირიცხავთ ფულს, არ არის ამის გამკეთებელი ბახტაძე", - განაცხადა დეპუტატმა.

მისი თქმით, ქართული ოცნების ხელში გაგრძელდება სახელმწიფო ინსტიტუტების რღვევა, ფასები ვერ დასტაბილურდება, ვერ დაიძლევა სიღარიბე და უმუშევრობა.

პრემიერ-მინისტრის, მამუკა ბახტაძის მიერ წარდგენილი სამთავრობო ცვლილებების მიხედვით, ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრო უქმდება.

სამინისტრო ფუნქციები გადანაწილდება სამ უწყებაზე:

• განსახლების ფუნქცია ინფრასტრუქტურისა და რეგიონული განვითარების სამინისტროს შეუერთდება;
• მიგრაცია - შსს-ს;
• სოციალური პოლიტიკა - ჯანდაცვის სამინისტროს.

ასევე ცვლილებები შეეხო არა მხოლოდ სამინისტროებს, არამედ მთავრობის შემადგენლობაში მყოფ სხვა სტრუქტურულ ერთეულებსაც.

• რელიგიის სააგენტო შერიგებისა და სამოქალაქო თანასწორობის საკითხებში სახელმწიფო მინისტრის აპარატს შეერწყმება;
• ეკონომიკის სამინისტროს სივრცითი განვითარების კომპონენტი რეგიონული განვითარებისა და ინფრასტრუქტურის სამინისტროში გადავა.