საქართველოს მესამე პრეზიდენტისა და ოდესის ყოფილი გუბერნატორის, მიხეილ სააკაშვილის თქმით, უნდა შეიქმნას ისეთი სისტემა, რომლითაც ხალხს ნებისმიერი თანამდებობის პირის ან ორგანოს დათხოვნა უნდა შეეძლოს. მისი თქმით, ახალი ტექნოლოგიების გამოყენებით პირდაპირი სახალხო დემოკრატია უნდა დაწესდეს.

მან, ასევე, დაამატა, რომ საქართველოს ნებისმიერ სრულწლოვან მოქალაქეს უნდა შეეძლოს პარლამენტიდან გამოიხმოს კანონპროექტი და მასზე გადაწყვეტილება თვითონ მიიღოს.

"ამ პირობებში ჩვენ არ ვიქნებით დამოკიდებული ჩინოვნიკებზე ან ჩინოვნიკის უკან მდგომ ოლიგარქზე ან ვინმე სხვაზე და მათ ხუშტურებზე. ამ შემთხვევაში ჩვენ ვეღარავის ვერ დავაბრალებთ ჩვენს უბედურებას. ჩვენ არ დაგვჭირდება ქუჩაში გამოსვლა და რაღაცების მოთხოვნა", - ამბობს სააკაშვილი ვიდეომიმართვაში.

ყოფილი პრეზიდენტის განმარტებით, ხმების გარკვეული რაოდენობის შემთხვევაში მოქალაქეებს უნდა შეეძლოთ კანონში ცვლილების შეტანა. მისივე თქმით, არის საფრთხე, რომ თუნდაც უმცირესობის შემავიწროებელი კანონი მიიღონ, მაგრამ დარეგულირდება:

"ეს უნდა ჩავდოთ კონსტიტუციაში, რომ თუ ჩვენ ვართ ევროპის ნაწილი, ევროპის ადამიანის უფლებათა კონვენციით შეზღუდულია ჩვენი გადაწყვეტილების მიღება".

სააკაშვილის განმარტებით, მსგავსი ცვლილებები განხორციელდება მას შემდეგ, რაც ხელისუფლება შეიცვლება, რის შემდეგაც ყველა გადაწყვეტილებას მოქალაქეები პირდაპირი სახალხო კენჭისყრით მიიღებენ:

"მე მინდა, რომ ეს ხელისუფლება გამოვართვა ივანიშვილს და დაგიბრუნოთ თქვენ [ხალხს]".

გაიგეთ მეტი: