გირჩის ლიდერი და საპრეზიდენტო კანდიდატი, ზურა ჯაფარიძე ამბობს, რომ პოლიციელებს სასამართლო სხდომაზე მისი დაკავების შესახებ საუბრის დროს თარიღები აერიათ. ჯაფარიძე 12 მაისის ღამეს დააკავეს, თუმცა, პოლიცია დაკავების მიზეზად სასამართლოზე 13 მაისის აქციის დროს შესაძლო გადაცდომებზე საუბრობდა. ამის შესახებ პარტიის ლიდერმა რამდენიმე წუთის წინ, სასამართლო სხდომის დასრულების შემდეგ განაცხადა.

სასამართლო სხდომაზე ზურა ჯაფარიძის ადვოკატი ამბობდა, გამონათქვამი, რომლის გამოც მისი დაცვის ქვეშ მყოფია დაკავებული გამოხატვის თავისუფლების სტანდარტში ჯდება. მისი განმარტებით, ჯაფარიძე ჟურნალისტებთან საუბრის დროს სწორედ ამ მიზეზით დააკავეს.

შსს-ს წარმომადგენელმა სასამართლო სხდომაზე განაცხადა, რომ ჯაფარიძის დაკავება ინტერვიუებს არ უკავშირდება და "აგრესიული ქცევების" დასადასტურებლად ვიდეოჩანაწერი წარადგინეს. შსს-ს წარმომადგენელმა, ირაკლი დუმბაძემ სასამართლოზე დისკი მიიტანა, რომელზეც, მისი თქმით, ასახული იყო, როგორ აყენებდა სიტყვიერ შეურაცხყოფას ჯაფარიძე პოლიციელებს.

დაცვის მხარე კონტრარგუმენტად ამბობდა, რომ "ვიდეო ტენდენციურად მოჭრილი იყო" და 10-წუთიანი, მათი თქმით, სრული ჩანაწერი წარადგინეს.

დღეს, 22 ივნისს მხარეთა ახსნა-განმარტებებს ისმენდა მოსამართლე. მოწმეები გამოიკითხებიან მომდევნო სხდომაზე, 13 ივლისს.

სხდომის დაწყებისას ზურა ჯაფარიძე და მისი ადვოკატი მოსამართლე ნინო ჭალიძის აცილებას ითხოვდნენ, რადგან მან ერთხელ უკვე განიხილა მისი საქმე და შეიძლება ჰქონოდა წინასწარი განწყობა.

ზურა ჯაფარიძე 12 მაისს თბილისში კლუბების ბასიანისა და გალერიში ჩატარებული სპეცოპერაციის ჩატარების შემდეგ გამართულ აქციაზე დააკავეს. მას ადმინისტრაციულ სამართალდარღვევათა კოდექსის 173-ე მუხლის დარღვევას ედავებიან.