"ვიქნები თუ არა ახალ შემადგენლობაში ჩემთვის, აბსოლუტურად, სულ ერთია", - ასე უპასუხა იუსტიციის მინისტრობის კანდიდატმა თეა წულუკიანმა კითხვას, მთავრობის ახალ შემადგენლობაში ყოფნის შესახებ.

მისი თქმით, გარეთ თუ შიგნით ის ქართული ოცნების გულშემატკივარი და თანამებრძოლი იქნება.

"მე მინდა იმ ადამიანებს, ვინც ამ კითხვას სვამს ვუთხრა, რომ ახალ შემადგენლობაში თუ ვარ ვიქნები, მე ვიქნები გარეთ, მე მექნება გაცილებით უფრო დიდი თავისუფლება პოლიტიკურ ასპარეზზე. არ აქვს მნიშვნელობა შიგნით ვიქნები თუ გარეთ, ჩემს გამონათქვამებში, პოზიციებში ვიქნები ქართული ოცნების გუნდის მხარდამჭერი მათი თანამებრძოლი. ჩემი გუნდში შიგნით ან გარეთ ყოფნით არაფერი იცვლება. გარეთ უფრო თავისუფალი და მოქმედი პირი ვიქნები, უფრო ძლიერი რადგან სტატუსი არ მექნება, უფრო შემტევი, რადგან ამ ქვეყანას ძლიერი ოპოზიცია სჭირდება", - განაცხადა თეა წულუკიანმა.

თავდაპირველად, თეა წულუკიანის იუსტიციის მინისტრის პოსტიდან გადადგომა 16-მა არასამთავრობო ორგანიზაციამ მოითხოვა. NGO სექტორის მოთხოვნას პოლიტიკური გაერთიანება გირჩი და რესპუბლიკური პარტია შეუერთდა.

გადადგომის მოთხოვნა დღის წესრიგში მას შემდეგ დადგა, რაც ყოფილ მთავარ პროკურორს ირაკლი შოთაძეს იუსტიციის მინისტრმა გაწეული საქმიანობისთვის მადლობა გადაუხადა და მხარდაჭერა აღუთქვა, მიუხედავად იმისა, რომ შოთაძის გადადგომის მიზეზი ხორავას ქუჩის საქმეზე გამოტანილი განაჩენი იყო. არასამთავრობოების მოთხოვნას ყოფილი პრემიერი გიორგი კვირიკაშვილი გამოეხმაურა, წულუკიანის გადადგომის მოთხოვნას აბსურდული უწოდა და არასამთავრობო სექტორი პოლიტიკურ დღის წესრიგში დაადანაშაულა.

ამ პროცესების შემდეგ, მოქალაქეების ნაწილმა იუსტიციის სამინისტროსთან აქცია გამართა სახელწოდებით: "თეა წადი". არასამთავრობოებისა და მოქალაქეების პოზიცია გაიზიარა საქართველოს პრეზიდენტმა გიორგი მარგველაშვილმა და განაცხადა, რომ წულუკიანის გადადგომის მოთხოვნა ლეგიტიმური იყო. თავად წულუკიანმა კი განაცხადა, რომ თანამდებობას მხოლოდ გუნდის გადაწყვეტილების საფუძველზე დატოვებს.

გაიგე მეტი: