პრემიერ-მინისტრობის კანდიდატმა, მამუკა ბახტაძემ განაცხადა, რომ საქართველოს სატრანზიტო პოტენციალის გამოსაყენებად ღრმაწყლოვანი პორტი აუცილებელია:

"ასეთი პორტის მშენებლობა არის აუცილებელი, რომ სრულფასოვნად ავითვისოთ ჩვენი ტრანზიტული პოტენციალი. ასევე, გავუწიოთ კონკურენცია ალტერნატიულ დერეფნებს. მე ადრეც მივესალმებოდი ღრმაწყლოვანი პორტის მშენებლობას იდეას და ყოველთვის მხარს დავუჭერ" –განაცხადა მამუკა ბახტაძემ.

მას შემდეგ, რაც გიორგი კვირიკაშვილმა თანამდებობა დატოვა, გავრცელდა ინფორმაცია, რომ კვირიკაშვილსა და პარტიის თავმჯდომარეს, ბიძინა ივანიშვილს შორის დაპირისპირების მიზეზი ანაკლიის პორტის მშენებლობა გახდა. კვირიკაშვილმა განაცხადა, რომ მასსა და მმართველ გუნდს შორის აზრთა სხვადასხვაობა გამოიკვეთა.

ანაკლიის ღრმაწყლოვანი ნავსადგური რამდენიმე ეტაპად აშენდება, პროცესი 9 ფაზას მოიცავს. პორტი 400 ჰექტარის ფართობზე შენდება და მისი მშენებლობისა და განვითარების ღირებულება 2,5 მილიარდ აშშ დოლარს შეადგენს. პორტის გამტარუნარიანობა, წელიწადში 100 მილიონი ტონა იქნება. ნავსადგური 2020 წელს გაიხსნება.