არგენტინის საკანონმდებლო ორგანოს ქვედა პალატამ მხარი დაუჭირა აბორტის ლეგალიზაციას. დებატები კანონპროექტის ირგვლივ ქვეყნის პარლამენტში 22 საათის განმავლობაში მიმდინარეობდა. ამის შესახებ ინფორმაციას BBC ავრცელებს.

საბოლოოდ, აბორტის ლეგალიზაციას მხარი 129 დეპუტატმა დაუჭირა, 125 დეპუტატმა საწინააღმდეგო პოზიცია დააფიქსირა, ხოლო ერთმა - თავი შეიკავა.

კანონპროექტი ითვალისწინებს, აბორტის ლეგალიზაციას ორსულობის საწყისი 14 კვირის განმავლობაში. უფრო დიდი ხნის ნაყოფის შემთხვევაში, აბორტი კვლავ არაკანონიერ ქმედებად განიხილება.

ამ დროისთვის, არგენტინაში მოქმედი კანონმდებლობის შესაბამისად, აბორტი ლეგალურია მხოლოდ მაშინ, თუ ორსულობა და ნაყოფი სასიცოცხლო საფრთხეს უქმნის დედას ან თუ ორსულობა ძალადობრივი სექსუალური აქტის, ან გაუპატიურების შედეგად დადგა.

არგენტინის პრეზიდენტი მაურისიო მაკრი კანონპროექტის წინააღმდეგია, თუმცა მისი განცხადებით, იგი არ გამოიყენებს ვეტოს უფლებას თუ კი პროექტი ორივე პალატაში მოიპოვებს უმრავლესობის მხარდაჭერას. კანონპროექტი განსახილველად სენატში გადაიგზავნება.