ჯანდაცვის კომიტეტის თავმჯდომარის, აკაკი ზოიძის თქმით, უცნობია იქნება თუ არა ბიძინა ივანიშვილი მომავალი პრემიერ-მინისტრი, მაგრამ მის კანდიდატურს მიესალმება:

"ჩვენ ყველამ ერთად მოვისმინეთ, მან ბრძანა რომ მოდიოდა პარტიის ასე ვთქვათ ლიდერად, პარტიის თავმჯდომარედ და ის არ იქნებოდა არც პრემიერი და არც პრეზიდენტი. თუ რაიმე შეიცვალა იმის მერე, მთავრობა გუშინ გადადგა, მე მხოლოდ მივესალმებოდი, ბატონი ბიძინა თუ განიხილავს თავის კანდიდატურას ამ პოსტზე. მაგრამ, კიდევ ერთხელ ვამბობ, ეს ბატონი ბიძინას გადასაწყვეტია."

გავრცელებული ინფორმაციით, პრემიერის პოსტზე ფინანსთა მინისტრის მოვალეობის შემსრულებელი, მამუკა ბახტაძე განიხილება.

ქართული ოცნების მმართველობის პერიოდში მესამე პრემიერ-მინისტრმა გიორგი კვირიკაშვილმა გუშინ, 13 ივნისს პრემიერ-მინისტრის თანამდებობა დატოვა. საქართველოს კონსტიტუციის თანახმად, პრემიერის გადადგომასთან ერთად, მთავრობის შემადგენლობაც გადამდგარად ითვლება.

პრემიერ-მინისტრის გადადგომის შემდეგ, საქართველოს კონსტიტუციის მიხედვით, პრეზიდენტმა არსებულ მთავრობას დააკისრა ვალდებულება ახალი მთავრობის არჩევამდე თავისი მოვალეობა შეასრულოს. ამის შემდეგ, შვიდი დღის განმავლობაში, საპარლამენტო უმრავლესობამ პრეზიდენტს პრემიერ-მინისტრობის კანდიდატი უნდა შესთავაზოს, რომელსაც იგი უკვე პარლამენტს წარუდგენს განსახილველად.

ასევე, შვიდდღიან ვადაში პრემიერ-მინისტრობის კანდიდატმა უნდა ჩამოაყალიბოს მთავრობის შემადგენლობა და პარლამენტს ნდობის მისაღებად უნდა წარუდგინოს. მან, ასევე, უნდა წარადგინოს სამთავრობო პროგრამაც.

ამის შემდეგ, კიდევ შვიდი დღის განმავლობაში, პარლამენტმა ეს ყველაფერი უნდა განიხილოს და კენჭი უყაროს. მაქსიმუმ 21 დღეში ახალი მთავრობა უნდა შეიქმნას.