Spiegel-ის ინფორმაციით, გერმანიაში ორი პირი დააკავეს, რომლებიც შესაძლოა ბრიუსელის ტერაქტის მოწყობაში იღებდნენ მონაწილეობას.

როგორც ირკვევა, დაკავებულთაგან ერთ-ერთმა აფეთქებამდე ცოტა ხნით ადრე თავის მობილურ ტელეფონზე შეტყობინება მიიღო, რომელშიც ხალიდ ელ ბაკრაოუის სახელი ეწერა, რომელმაც ბრიუსელის აეროპორტში ბომბი ააფეთქა.

მანამდე, 24 მარტს, ბელგიის პოლიციის მიერ ჩატარებული რეიდების შედეგად, 6 პირი ბრიუსელშიც დააკავეს, რომლებიც ასევე შესაძლოა ბრიუსელში მომხდარი ტერორისტული აქტის უკან იდგნენ.

ამ დროისთვის, ბელგიის ოფიციალური უწყებები ამბობენ, რომ სამშაბათს მომხდარი ტერაქტის უკან სავარაუდოდ 5 პირი იდგა, რომელთაგან 3 უკვე მკვდარია, დანარჩენ ორს კი ჯერ ისევ ეძებენ.

22 მარტს ბრიუსელის საერთაშორისო აეროპორტსა და მეტროსადგურში მომხდარი ტერაქტების შედეგად 31 ადამიანი დაიღუპა, 330 კი დაშავდა. ტერაქტზე პასუხისმგებლობა ტერორისტულმა დაჯგუფებამ ISIS აიღო.