შინაგან საქმეთა სამინისტრომ პარლამენტთან დაკავებულთა სიიდან ლევან ხაბეიშვილის გვარი ამოიღო. ხაბეიშვილის დაკავების შესახებ ინფორმაცია, თავდაპირველად, მისმა თანაგუნდელმა, ზაალ უდუმაშვილმა გაავრცელა, მოგვიანებით კი შსს-მ დაადასტურა.

ბრიფინგს გამოეხმაურა ლევან ხაბეიშვილი და განაცხადა, რომ ის არც ერთი წუთით არ ყოფილა დაკავებული.

ხაბეიშვილის გვარის მოღებით უწყების პრესრელიზში შემცირდა დაკავებულთა რაოდენობაც. პარლამენტის წინ სულ რვა პირი დააკავეს. მათ შორის არის თბილისის საკრებულოს წევრი ნაციონალური მოძრაობიდან ირაკლი ნადირაძე.

უწყების განმარტებით, დაკავებულებმა დაარღვიეს საზოგადოებრივი წესრიგი, სიტყვიერი შეურაცხყოფა მიაყენეს სამართალდამცველებს და არ დაემორჩილნენ პოლიციის კანონიერ მოთხოვნებს.