დაბა გუდაურში მომხდარი კონფლიქტის გამო შინაგან საქმეთა სამინისტრომ გამოძიება სისხლის სამართლის კოდექსის 126-ე და 187-ე მუხლებით დაიწყო, რაც ძალადობასა და სხვისი ნივთის დაზიანებას გულისხმობს.

უწყების განმარტებით, გამოძიების ფარგლებში, გამოიკითხეს კონფლიქტში მონაწილე რუსეთის ორივე მოქალაქე და დანიშნულია შესაბამისი ექსპერტიზები:

"მიმდინარეობს ინტენსიური საგამოძიებო ღონისძიებები დანაშაულის ჩამდენი პირების იდენტიფიცირების მიზნით".

შსს-ს ცნობით, გუშინ, 9 ივნისს ქართველმა მფრინავებმა დაბა გუდაურში პარაპლანით საფრენ ტერიტორიაზე მისასვლელ გზაზე მოძრაობა შეაფერხეს და რუსეთის მოქალაქეებს - პარაპლანისტებს გადაადგილების საშუალება არ მისცეს:

"დაპირისპირების შედეგად, ქართველმა პარაპლანით მფრინავებმა რუსეთის მოქალაქეებს: სერგეი დემენტიევს და ფეოდორ ჩელიშევს სიტყვიერი და ფიზიკური შეურაცხყოფა მიაყენეს და ავტომანქანები დაუზიანეს".

კონფლიქტის დროს დაშავებული ფეოდორ ჩელიშევი ამ დროისთვის თბილისის ერთ-ერთ სამედიცინო დაწესებულებაში მკურნალობს.

უწყებამ წინა დღეს, 8 ივნისს გუდაურში საქართველოსა და უკრაინის რესპუბლიკის მოქალაქეებს შორის მომხდარ კონფლიქტის ფაქტზეც დაიწყო გამოძიება ძალადობის მუხლით.

მაშინ ქართველ პარაპლანით მფრინავებსა და უკრაინის მოქალაქეებს შორის, რომლებსაც გუდაურის ახლოს იჯარით აქვთ აღებული პარაპლანით დაშვების ადგილები, მოხდა კონფლიქტი. შსს-ს ინფორმაციით, ქართველმა მფრინავებმა უკრაინის მოქალაქეებს სიტყვიერი და ფიზიკური შეურაცხყოფა მიაყენეს.

გამოძიების ვერსიით, ქართველი პარაპლანით მფრინავები შემთხვევით უკრაინის მოქალაქეების მიერ იჯარით აღებულ ტერიტორიაზე დაეშვნენ, რასაც უკრაინელების უკმაყოფილება და მხარეთა შორის კონფლიქტი მოჰყვა.

მიმდინარე გამოძიების ფარგლებში, პოლიციამ შემთხვევის ადგილი დაათვალიერა და სამივე დაზარალებული გამოკითხა. ასევე, ტარდება ყველა შესაბამისი ექსპერტიზა.