გუშინ, 24 მარტს, ბელგიის პოლიციის მიერ ჩატარებული რეიდების შედეგად 6 პირი დააკავა, რომლებიც შესაძლოა ბრიუსელში მომხდარი ტერორისტული აქტის უკან იდგნენ. ბელგიის ფედერალური პროკურატურა დეტალებს, დაკავებულების სახელებსა და დაკავების მიზეზებს ჯერ არ ასაჯაროებს.

ადგილობრივი მედიის ცნობით, სამართალდამცავმა ორგანოებმა 2 პირი ბრიუსელის ერთ-ერთი დასახლება ჯეტში, ერთი დედაქალაქის სხვა ნაწილში, სამი კი ფედერალური პროკურატურის მიმდებარე ტერიტორიაზე მდგომ ავტომობილში დააკავეს.

ამ დროისთვის, ბელგიის ოფიციალური უწყებები ამბობენ, რომ სამშაბათს მომხდარი ტერაქტის უკან სავარაუდოდ 5 პირი იდგა, რომელთაგან 3 უკვე მკვდარია, დანარჩენ ორს კი ჯერ ისევ ეძებენ.

22 მარტს ბრიუსელის საერთაშორისო აეროპორტსა და მეტროსადგურში მომხდარი ტერაქტების შედეგად 31 ადამიანი დაიღუპა, 330 კი დაშავდა. ტერაქტზე პასუხისმგებლობა ტერორისტულმა დაჯგუფებამ ISIS აიღო.