თბილისის მეტრო არც 5 ივნისს იმუშავებს. ამის შესახებ მეტროს მემანქანეებმა მერთან შეხვედრის შემდეგ განაცხადეს. მათ შეხვედრა პროტესტის ნიშნად დატოვეს.

მათი თქმით, მერია მათ ხელფასის ზრდას არა ახლა, არამედ 2019 წლისთვის დაპირდა.

მემანქანეებს შეხვედრა ჰქონდათ მერიაში თბილისის მერთან, მერის მოადგილესთან და სატრანსპორტო კომპანიის ხელმძღვანელთან ერთად. შეხვედრის შემდეგ გლდანის დეპოში გადაინაცვლეს, სადაც მეტროს სხვა თანამშრომლებს შეხვდნენ.

შეხვედრაზე შესვლამდე მემანქანეებმა განაცხადეს, რომ სურთ დაისაჯონ ის პირები, ვინც დეპოს შესასვლელი დახურა და საპირფარეშოში შესვლის უფლებას არ აძლევდნენ მეტროს თანამშრომლებს.

მეტროს მემანქანეებმა გაფიცვა და შიმშილობა გუშინ წინ, 2 ივნისს დაიწყეს, რამაც დღეს, 4 ივნისს, მეტროს პარალიზება გამოიწვია. გაფიცვა ხელფასების ზრდას უკავშირდება. მეტროს მემანქანეები მოითხოვენ, რომ მათი თანამდებობრივი სარგო 45%-ით გაიზარდოს.

კახა კალაძის თქმით კი, მეტროს მემანქანეების პროტესტი მოქალაქეების შანტაჟი და ულტიმატუმებით საუბარია.

სატრანსპორტო კომპანია მემანქანეებს კანონის დაცვისკენ მოუწოდებს. მეტროს მემანქანეების გაფიცვის გამო საზოგადოებრივი ტრანსპორტი უფასოდ მოძრაობს.