მეტროპოლიტენის თანამშრომლები ხვალ, 3 ივნისს, ანაზღაურების გაზრდის მოთხოვნით უვადო გაფიცვასა და შიმშილობას იწყებენ. ერთობა 2013-ის მიერ გავრცელებული განცხადების მიხედვით, პროცესი 15 საათზე გლდანის დეპოში დაიწყება, რაც 4 ივნისს მეტროს სრულ პარალიზებას გამოიწვევს.

"ყველა იმ შემთხვევაზე, რაც გამოიწვევს ჩვენი თანამოქალაქეების დისკომფორტს ან საფრთხეს შეუქმნის რომელიმე სასიცოცხლო მნიშვნელობის უწყების ფუნქციონირებას, პასუხისმგებლობას სრულად ვაკისრებთ დამსაქმებელს და ყველა იმ სუბიექტს, რომელთაც ამ დავის უმტკივნეულოდ გადაწყვეტა ხელეწიფებოდათ", - ნათქვამია განცხადებაში.

ასევე, მათი თქმით, მემანქანეთა კავშირი ემორჩილება სასამართლოს გადაწყვეტილებას არასამუშაო დროს გაფიცვაზე, რაც იმას გულისხმობს, რომ ისინი დასვენების დროს შემდეგი ცვლისთვის მომზადების ნაცვლად გაიფიცებიან.

"აქედან გამომდინარე, ჩვენ ვვარაუდობთ, რომ დასვენების დროს საგაფიცვო რეჟიმში ყოფნის გამო, გარკვეული პერიოდის შემდგომ ფიზიკურად ვეღარ შევძლებთ ქალაქისა და მოსახლეობის მომსახურებას ჩვენი ჯანმრთელობის მდგომარეობიდან გამომდინარე",- ამბობს ერთობა 2013 და ამაზეც სრულ პასუხისმგებლობას თბილისის მერიასა და სატრანსპორტო კომპანიას აკისრებს.

მემანქანეთა გაფიცვა


შპს თბილისის სატრანსპორტო კომპანიასთან კოლექტიური შრომითი დავა რამდენიმე თვეა მიმდინარეობს, რომლის ფარგლებში მიმდინარე მოლაპარაკებების წარუმატებლობის გამო, მეტროს თანამშრომლებმა კანონმდებლობით დადგენილი წესით 2018 წლის 3 მაისს გაფიცვა დააანონსეს, რომელიც თბილისის საქალაქო სასამართლოს მიერ 30 დღის ვადით 2018 წლის 3 ივნისამდე გადაიდო.

2018 წლის 21 მაისს თბილისის საქალაქო სასამართლომ, ამჯერად განუსაზღვრელი ვადით შეზღუდა პროფესიულ გაერთიანების წევრი მეტროს მემანქანეების გაფიცვაში მონაწილეობის მიღების უფლება "სამუშაო საათების განმავლობაში".