ადამიანის უფლებებზე მომუშავე არასამთავრობო ორგანიზაციები მიიჩნევენ, რომ ქვეყანაში დღეს კრიზისული მდგომარეობაა და აუცილებელია დაიწყოს პროკურატურის, სახელმწიფო უსაფრთხოების სამსახურისა და შინაგან საქმეთა სამინისტროში ძირეული რეფორმა. ასე გამოეხმაურა 16 ორგანიზაცია ზაზა სარალიძის მხარდასაჭერ აქციებს.

"საზოგადოების მიერ გამოხატული საზოგადოებრივი პროტესტის ტალღა მხოლოდ ხორავას ქუჩაზე მომხდარი შემთხვევის არასათანადო გამოძიების პრობლემას არ უკავშირდება და ის უფრო ფართედ უსამართლო მართლმსაჯულების სისტემისა და სოციალური პოლიტიკის მიმართ საზოგადოებაში დაგროვილი უკმაყოფილების გამოხატულებაა", - ვკითხულობთ განცხადებაში.

მათ მიაჩნიათ, რომ საზოგადოების შეშფოთება, პირველ რიგში, გამოწვეულია სამართალდამცავ და სასამართლო სისტემაში პოლიტიკური კორუფციისა და ადამიანის უფლებების ფუნდამენტური სტანდარტების უგულებელყოფის შემთვხვევებით.

"სამართალდამცავ და სასამართლო სისტემაში ხელისუფლების მიერ დეკლარირებული რეფორმების დიდი ნაწილი ფორმალური ხასიათის აღმოჩნდა და საზოგადოებაში ღრმა უსამართლობის და დაუცველობის განცდა ვერ აღმოფხვრა. ბოლო პერიოდის გახმაურებულ საქმეებში აშკარად დადგა სამართალდამცავი ორგანოების მხრიდან უფლებამოსილების გადამეტების პრობლემა, რასაც ეფექტიანი გამოძიება არ მოჰყოლია", - აღნიშნულია განცხადებაში.

არასამთავრობო ორგანიზაციებს მიაჩნიათ, რომ კრიზისული ვითარებიდან გამოსასვლელად ხელისუფლებამ მკაფიო პოლიტიკური ნება უნდა გამოავლინოს და დაგროვილი სისტემური პრობლემები უნდა აღმოფხვრას.

ხელმომწერი ორგანიზაციები

  • სამართლიანი არჩევნებისა და დემოკრატიის საერთაშორისო საზოგადოება (ISFED);
  • ღია საზოგადოების ფონდი;
  • ადამიანის უფლებების სწავლებისა და მონიტორინგის ცენტრი (EMC);
  • საქართველოს დემოკრატიული ინიციატივა (GDI);
  • საქართველოს ახალგაზრდა იურისტთა ასოციაცია;
  • საერთაშორისო გამჭვირვალობა - საქართველო;
  • ადამიანის უფლებათა ცენტრი;
  • კონსტიტუციის 42-ე მუხლი;
  • პარტნიორობა ადამიანის უფლებებისთვის (PHR);
  • დემოკრატიისა და უსაფრთხო განვითარების ინსტიტუტი (IDSD);
  • თანასწორობის მოძრობა;
  • თემიდა;
  • ტოლერანტობის და მრავალფეროვნების ინსტიტუტი (TDI);
  • მედია განვითარების ფონდი (MDF);
  • ქალთა ინიციატივების მხარდამჭერი ჯგუფი (WISG);
  • ინფორმაციის თავისუფლების განვითარების ინსტიტუტი (IDFI).