საქართველოს პარლამენტის თავმჯდომარემ ირაკლი კობახიძემ პლენარულ სხდომაზე ხორავას ქუჩის საქმეზე საგამოძიებო კომისიის შექმნის მნიშვნელობაზე ისაუბრა, მისი თქმით, დღევანდელმა განაჩენმა დატოვა კითხვის ნიშნები, თუ ვინ არის დამნაშავე დავით სარალიძის მკვლელობაში.

პარლამენტის თავმჯდომარის თქმით, ამ კითხვას პასუხი უნდა გაეცეს და სასამართლო აგრძელებს მსჯელობას, მაგრამ პარლამენტმა ბერკეტი, საგამოძიებო კომისიის სახით, აუცილებლად უნდა გამოიყენოს.

"ეს საქმე გამორჩეულია იმით, რომ ხელისუფლებას არ აქვს სუბიექტური ინტერესი სისხლის სამართლის საქმეების მიმართ, განსაკუთრებით მაშინ, როცა საქმე ეხება ასეთ ტრაგედიას", - განაცხადა ირაკლი კობახიძემ.

მისივე განცხადებით, ხორავას ქუჩის საქმის შედარება გირგვლიანის საქმესთან მმართველი გუნდისთვის კატეგორიულად მიუღებელია.

"გირგვლიანის საქმე იყო ხელისუფლების დანაშაული, რომელიც ჩადენილ იქნა ერთი ადამიანის წინააღმდეგ. ამ შემთხვევაში ჩვენ საქმე გვაქვს მძიმე დანაშაულთან, რომელიც უნდა გამოიძიონ. ჩვენი მთავარი ინტერესი არის ის, რომ აღსრულდეს სამართალი და ყველა კითხვას პასუხი გაეცეს", - განაცხადა ირაკლი კობახიძემ.

მისი თქმით, მას შემდეგ, რაც უმრავლესობამ საგამოძიებო კომისიის შექმნის გადაწყვეტილება მიიღო, ევროპულმა საქართველომ, როგორც ინიციატივის ავტორმა, რიტორიკა შეიცვალა.

"ამ ყველაფერს წინ უძღოდა ნიკა გვარამიას მოწოდება რადიკალიზმისკენ. მან უნდობლობა გამოუცხადა ჯერ არშექმნილ კომისიას, ამას მოჰყვა ევროპული საქართველოს განცხადებები, რომელთა თქმით, გაუგებარია რისთვის იქმნება კომისია", - განაცხადა კობახიძემ.

საქართველოს პარლამენტის თავმჯდომარის აზრით, დღეს ოპოზიცია ნდობას უცხადებს მოსამართლეს და უნდობლობას უცხადებენ პროკურატურას, როცა სხვა შემთხვევებში პირიქით იყო. კობახიძის თქმით, ეს ყველაფერი აჩენს ეჭვს, რომ გამოკვეთილია პოლიტიკური ინტერესი. ამ პროცესის უკან თავმჯდომარე ნაციონალურ მოძრაობას მოიაზრებს.

"აშკარად ჩანს, ვინ არის ამ პროცესის ლიდერი, ერთ-ერთი არის ნიკა გვარამია. გვარამია პირდაპირ მოუწოდებს ადამიანებს აჯანყებისკენ. ეს არის ნიკა გვარამიას, ანუ ნაციონალური მოძრაობის პოზიცია. ნიკა გვარამია არის ის ადამიანი, რომელიც ფუთავდა 7 ნოემბრის საქმეს და ფუთავდა გირგვლიანის მკვლელობას, ეს არის უბინძურესი ადამიანი და უბინძურესი ლიდერი, რომელიც არის პირდაპირ პასუხისმგებელი ნაცმოძრაობის მიერ ჩადენილ დანაშაულებებზე", - განაცხადა ირაკლი კობახიძემ.

მისი განცხადებით ნაციონალური მოძრაობა ვერანაირ ქულებს ვერ დაიწერენ ამ ტრაგედიაზე.

"არ დავუშვებთ, რომ ამ ტრაგედიით ვინმემ პოლიტიკური ქულები დაიწეროს. საგამოძიებო კომისიის ერთადერთი ინტერესი არის, გაირკვეს თითოეული დეტალი, თუ რა და როგორ მოხდა. მე დარწმუნებული ვარ, რომ სამართალი აღსრულდება და ამის გარანტი არის ჩვენი გუნდი", - განაცხადა ირაკლი კობახიძემ.

დავით სარალიძის მკვლელობაში ბრალდებული გამოძიებას არ ჰყავს და დაკავებულს ედავებიან მხოლოდ განზრახ მკვლელობის მცდელობას.

პროკურორმა, მარიამ გოგოხიამ განაცხადა, რომ განაჩენს სააპელაციო სასამართლოში გაასაჩივრებს.

ამ წუთებში, დავით სარალიძის მამა ზაზა სარალიძე პროკურატურასთან აქცია მართავს და მოსახლეობას მხარდაჭერისკენ მოუწოდებს. ის მთავარი პროკურორის გადადგომასა და შვილის მკვლელის დაჭერას მოითხოვს.

მთავარმა პროკურორმა ირაკლი შოთაძემ საგანგებო ბრიფინგზე განაცხადა, რომ სასამართლოს გადაწყვეტილებას უნდობლობას უცხადებს და საქმეში საერთაშორისო ექსპერტებსა და ექსპერტიზას რთავს.