საქართველოს მთავარი პროკურორის ირაკლი შოთაძის განცხადებით, ის არ იმალება და პასუხს აგებს ამ საქმეში ჩართული ყველა პროკურორის საქმიანობაზე.

ირაკლი შოთაძის განცხადებით, საქმეში არსებული 100 მოწმიდან მხოლოდ 4 თანამშრომლობს პოლიციასთან, 51 სკოლის 14 მოწმიდან კი არც ერთი არ ამბობს ვინ ეკავა დანა, რომლითაც დავით სარალიძეს სასიკვდილო ჭრილობები მიაყენეს.

"მე მზად ვარ ავიღო პასუხისმგებლობა, თუმცა საზოგადოებამაც უნდა აიღოს პასუხისმგებლობა, რომ საქმე ბოლომდე მივიყვანოთ. ჩვენ ვართ ღია და ჩვენ არაფერს არ ვემალებით, მე არ ვიმალები და პასუხისმგებელი ვარ თითოეული ჩვენი პროკურორის საქმიანობაზე, თუმცა გამოძიებამ და პროკურატურა გააკეთა ყველაფერი, რაც ამ ეტაპზე გასაკეთებელი იყო", - განაცხადა პროკურორმა.

მისი თქმით, იმისთვის არსებობს სამი ინსტანციის სასამართლო, რომ მართლმსაჯულება აღსრულდეს.

"მე როდესაც ვსაუბრობ ჩემს პასუხისმგებლობაზე, მე ეს კარგად მაქვს გათვიცნობიერებული, მაგრამ ჩვენ, საზოგადოებამ უნდა გავაცნობიეროთ, რომ კრიმინალთან ბრძოლა საზოგადოების გვერდში დგომის გარეშე არის რთული", - განაცხადა ირაკლი შოთაძემ.

მთავარი პროკურორის განცხადებით, ხორავას ქუჩის საქმის გამოძიებაში ჩაერთვებიან საერთაშორისო პროკურორები და ასევე ექსპერტიზა ჩატარდება შვეიცარიის საექსპერტო ბიუროში. პროცესში ჩართვის საშუალება ექნება ზაზა სარალიძესაც.

დავით სარალიძის მკვლელობაში ბრალდებული გამოძიებას არ ჰყავს და დაკავებულს ედავებიან მხოლოდ განზრახ მკვლელობის მცდელობას.

პროკურორომა, მარიამ გოგოხიამ განაცხადა, რომ განაჩენს სააპელაციო სასამართლოში გაასაჩივრებს.