სომხეთის ახალი პრემიერი ნიკოლ პაშინიაში საქართველოში პირველი ვიზიტით იმყოფება. სომხეთის დელეგაციას აეროპორტში საქართველოს საგარეო საქმეთა მინისტრი დახვდა.

ნიკოლ პაშინიანის ვიზიტის ფარგლებში თბილისში გაიმართება საქართველოს და სომხეთის პრემიერ-მინისტრების, გიორგი კვირიკაშვილის და ნიკოლ პაშინიანის შეხვედრა. პირისპირ შეხვედრის შემდეგ მოლაპარაკება გაგრძელდება ორი ქვეყნის სამთავრობო დელეგაციების მონაწილეობით. შეხვედრის დასრულების შემდეგ პრემიერ-მინისტრები ერთობლივ ბრიფინგს გამართავენ.

გიორგი კვირიკაშვილი და ნიკოლ პაშინიანი დაესწრებიან სომხეთის დამოუკიდებელი რესპუბლიკის გამოცხადებიდან მეასე წლისთავისადმი მიძღვნილ მიღებას, რომელიც თბილისის საკრებულოს შენობაში გაიმართება.

საქართველოში ორდღიანი ოფიციალური ვიზიტისას ნიკოლ პაშინიანი შეხვდება პრეზიდენტს, გიორგი მარგველაშვილს და პარლამენტის თავმჯდომარეს, ირაკლი კობახიძეს. სომხეთის ახალი ამბების სააგენტო საქართველოში სომხეთის საელჩოზე დაყრდნობით იუწყება, რომ ნიკოლ პაშინიანი ეწვევა სამცხე-ჯავახეთის რეგიონს, სადაც ეთნიკურად სომეხ მოსახლეობას შეხვდება.

სომხეთის ახლადარჩეულმა პრემიერმა, ნიკოლ პაშინიანმა განაცხადა, რომ საქართველოსა და სომხეთს შორის ურთიერთობები გეოპოლიტიკურ გავლენებს არ უნდა ეფუძნებოდეს და კიდევ უფრო უნდა გაღრმავდეს.

"საქართველო მეგობარი სახელმწიფოა. საქართველოსა და სომხეთის ძმური ურთიერთობები უნდა განვითარდეს, რადგან ჩვენ ვართ მოძმე ქვეყნები და ახლო პარტნიორები. ჩვენი პარტიის პროგრამაში საქართველოს გადამწყვეტი მნიშვნელობა აქვს სომხეთისთვის.

ვფიქრობ, ჩვენი ურთიერთობები გეოპოლიტიკურ გავლენებს არ უნდა ეფუძნებოდეს. ზოგჯერ ჩვენ ურთიერთობებზე გავლენას ახდენს გეოპოლიტიკური ფაქტორები და სამწუხაროდ, ამ ფაქტორების გავლენა ყოველთვის პოზიტიური არ არის. ზოგჯერ გვაქვს ნეგატივი", – განაცხადა ნიკოლ პაშინიანმა.

ყოფილი პრემიერ-მინისტრი სერჟ სარგსიანი თანამდებობიდან 23 აპრილს, 11-დღიანი საპროტესტო აქციების შემდეგ გადადგა. აქციების ორგანიზატორი და ოპოზიციის ლიდერი, ნიკოლ პაშინიანი პრემიერ-მინისტრად 8 მაისს აირჩიეს.