მარნეულისა და ქარელის მუნიციპალიტეტების ბაგა-ბაღებში საქონლის ხორცის ნაცვლად, მოტყუებით, ცხენის ხორცის შეტანის ფაქტებზე 2 პირი დააკავეს.

"გამოძიებით დადგინდა, რომ კომპანიებს – "ბი.ჯი.ემ.1"-სა და "ქართული ხორც-პროდუქტების ფერმას" მოგებული ჰქონდათ ა(ა)იპ "მარნეულის მუნიციპალიტეტის ტერიტორიაზე არსებული ბაგა-ბაღების გაერთიანებისა" და ა(ა)იპ "ქარელის მუნიციპალიტეტის ტერიტორიაზე არსებული ბაგა-ბაღების გაერთიანების" მიერ გამოცხადებული ტენდერები, რომელთა ფარგლებშიც ევალებოდათ საბავშვო ბაღებისთვის საქონლის ხორცის მიწოდება. აღნიშნული კომერციული ორგანიზაციების დირექტორებმა, 2026 წლის მაისში, საბავშვო ბაღებში საქონლის ხორცის ნაცვლად, მოტყუებით, შეიტანეს ცხენის ხორცი და შედეგად, თაღლითურად დაეუფლნენ სახელმწიფო ბიუჯეტის კუთვნილ დიდი ოდენობით თანხას," — წერს სუს.

გამოძიება საქართველოს სისხლის სამართლის კოდექსის 180-ე მუხლის მესამე ნაწილის "ბ" ქვეპუნქტით, ასევე 197-ე მუხლის პირველი ნაწილით მიმდინარეობს, რაც სასჯელის სახით 6-დან 9 წლამდე ვადით თავისუფლების აღკვეთას ითვალისწინებს.

"ქართლის ამბების" ცნობით, ქარელის საბავშვო ბაღებისთვის მიწოდებულ საქონლის ხორცში ცხენის ხორცის დნმ-ის კვალი აღმოჩნდა. ამის შესახებ სურსათის ეროვნული სააგენტოს დასკვნაშია აღნიშნული, რომელიც ბაღების გაერთიანებას გაეგზავნა.

2026 წლის ივნისში ქარელის მერიამ მოულოდნელად საბავშვო ბაღებისთვის ხორცის ახალი მიმწოდებლის მოძიება დაიწყო და მიზეზად ჰიგიენური ნორმების დაუკმაყოფილებლობა დაასახელა. თუმცა, მედიაგამოცემის ცნობით, უწყება მალავდა, რომ რეალურად საქმე ცხენის ხორცს ეხებოდა. ივნისის მდგომარეობით, კომპანიას საბავშვო ბაღებისთვის 76 673 ლარის ღირებულების ხორცი ჰქონდა მიწოდებული.