21 ივლისს, შავი ზღვის მეათე ჯაზფესტივალის სტუმრების განწყობაზე ბიგ–ბიტის პიონერმა, ელექტრონული და როკ მუსიკის, პლიუს მსოფლიოში ერთ–ერთი ყველაზე ხარისხიანი ლაივ შემსრულებელმა ჯგუფმა პროდიჯიმ იზრუნა.

„გესმის ჩემი საქართველო?“ - შავი ზღვის ჯაზფესტივალის სცენიდან დასმულ კითხვას მთელმა სანაპირომ უპასუხა.

ბათუმის ჩოგბურთის კორტების ტერიტორია ხალხმა და ელექტრონული მუსიკის რიტმებმა აავსო. თუმცა, ეს ყველაფერი როდია. უბილეთოდ დარჩენილი მაყურებლის საკმაოდ დიდი რიცხვი კორტების მიმდებარე ტერიტორიასაც მოედო და ჯებირებს გარეთაც შექმნა საფესტივალო გარემო.

„მზად ხარ საქართველო?“ - მსმენელს კითხვა პროდიჯის სოლისტმა მაქსიმმა დაუსვა. კონცერტმა ცხადყო, რომ მაყურებელი მზად იყო ის ენერგია სრულად მიეღო, რაც გუნდის წევრებმა სცენიდან გასცეს.

აქტიური ურთიერთობა მსმენელთან, გასამხნევებელი შეძახილები, ცოტაოდენი ბათუმური წვიმა და გემოვნებიანი მუსიკა - ამ კომპონენტების შერევით, ბათუმის სანაპირომ, მორიგ გრანდიოზულ შოუს ანშლაგით უმასპინძლა.

Check in Georgia-ს ფარგლებში მიმდინარე შავი ზღვის რიგით მე-10 ჯაზფესტივალმა სტარტი 15 ივლისს აიღო და უკვე უმასპინძლა მსოფლიო დონის შემსრულებლებს. ამ ეტაპზე კი ჯაზფესტივალი პროგრამული ცვლილებებით გრძელდება. ქრის ბრაუნის და ჯეიმი კალუმის ნაცვლად, ბათუმს ბასტა რაიმსი და ნიკ ვესტი ეწვევიან. ჯერჯერობით უცნობია, იქნება თუ არა რამე ცვლილება სხვა დღეებში. ცნობილია, რომ ჯაზფესტივალს 24 ივლისს, მეისი გრეი დახურავს.