"ლოგიკურად ჩნდება კითხვა, ხომ არ დავაკელით რაიმე არაღიარების პოლიტიკას?" - ასე გამოეხმაურა საერთაშორისო ურთიერთობების სპეციალისტი, გია ჯაფარიძე სირიის მიერ ცხინვალის რეგიონისა და აფხაზეთის დამოუკიდებლობის აღიარებას.

"შემთხვევით, ეს ქართული დიპლომატიის ჩავარდნა ხომ არ არის? არ ვამბობ, რომ ეს ასეა, ლოგიკურად ისმის ეს კითხვა", - განმარტავს ჯაფარიძე On.ge-სთან საუბრისას.

გია ჯაფარიძის თქმით, მანამდე რუსეთმა, ნიკარაგუამ, ვენესუელამ და ნაურუმ საერთაშორისო ნორმების ფუძემდებლური პრინციპების დარღვევით სხნო ამ ტერიტორიების დამოუკიდებლობა.

"სირია რთული შემთხვევაა. იქ უკვე რამდენიმე წელია მიმდინარეობს ომი. ამ წლების განმავლობაში ასადზე იყო რუსეთის წნეხი და ჩვენ ეს ვიცით. მიუხედავად ამისა, ამდენი ხნის განმავლობაში, ასადს აფხაზეთისა და ცხინვალის რეგიონი დამოუკიდებელ სახელმწიფოებად არ უღიარებია. კითხვა ისმის, რა მოხდა ახლა, ვეღარ გაუძლო რუსეთის წნეხს? როდის ვეღარ გაუძლო როდესაც პოზიციები გაიმყარა? ანუ, ყველაზე კრიტიკული მომენტი რომ ჰქონდა ასადს, როდესაც კბილებით დაიცვეს რუსებმა, მაშინ რატომ არ აღიარა? ლოგიკას რომ გავყვეთ, ყველაზე კრიტიკულ მომენტში არ გააკეთა აღიარება და ახლა აღიარებს. მაშინ გაუძლო წნეხს და ახლა ვერ უძლებს? კიდევ ერთი კითხვა, ხომ არ არის ეს შედეგი იმ გეოპოლიტიკური პროცესებისა, რომელსაც ადგილი აქვს [ახლო აღმოსავლეთის] რეგიონში?" - ამბობს საერთაშორისო ურთიერთობების ექსპერტი.

გია ჯაფარიძე აღნიშნავს იმასაც, რომ ასადმა რუსეთის დახმარებით, მოახერხა და აკონტროლებს სირიის ტერიტორიის საკმაოდ დიდ ნაწილს. მისივე განმარტებით, იმის თქმა, ასადი არის თუ არა სირიელი ხალხის პრეზიდენტი, არასწორი ფორმულირებაა.