შინაგან საქმეთა სამინისტრომ მოსამართლის განჩინების საფუძველზე, 1988 წელს დაბადებული პირი ჯგუფურად ჩადენილი ყაჩაღობის ბრალდებით დააკავა. ბრალდება 6-დან 12 წლამდე ვადით თავისუფლების აღკვეთას ითვალისწინებს.

შსს-ს ცნობით, 2017 წლის 29 დეკემბერს, ცივი იარაღით შეიარაღებული, ნიღბიანი პირი თანამზრახველებთან ერთად, წალკის რაიონის სოფელ აიაზმაში, ყაჩაღურად თავს დაესხა 1954 წელს დაბადებული პირის საცხოვრებელ სახლს.

"თავდამსხმელებმა ქალბატონს სიცოცხლის მოსპობის მუქარით 40 ათასი ლარის ღირებულების ოქროს სამკაულები, 14 ათასი ლარი, 100 ათასი რუბლი, 300 ევროს ღირებულების მობილური ტელეფონი გასტაცეს და შემთხვევის ადგილიდან მიიმალნენ", - ნათქვამია შსს-ს განცხადებაში.

პოლიციის ცნობით, ნაყაჩაღარი ნივთების ნაწილი ნივთმტკიცებად ამოიღო. სამართალდამცველებმა ბრალდებული ბათუმში დააკავეს.

გამოძიება ბინაში უკანონო შეღწევით, დიდი ოდენობით ნივთის დაუფლების მიზნით, ჯგუფურად ჩადენილი ყაჩაღობის ფაქტზე მიმდინარეობს.