ძიუდოს ფედერაციის პრეზიდენტის, დავით ქევხიშვილის თქმით, პრეზიდენტობის თანამდებობის არდატოვება მისი პრინციპული პოზიციაა. ამის შესახებ მან ფეისბუქზე გავრცელებულ განცხადებაში თქვა. როგორც თვითონ ამბობს, მას სურს, რომ სპორტსმენები ვარჯიშს დაუბრუნდნენ და მათ 5-პუნქტიანი შეთავაზებით მიმართავს:

• სპორტსმენებმა უნდა აირჩიონ პირი, ვისაც ნდობას გამოუცხადებენ და ქევხიშვილი მას თანაშემწედ დანიშნავს ნაკრებთან ურთიერთობის საკითხებში;
• სპორტსმენებმა უნდა წარმოადგინონ თავიანთთვის ყველაზე სასურველი მწვრთნელი და მას უახლოეს პერიოდში მთავარი მწვრთნელის თანაშემწედ დანიშნავენ;
• ამ ყველაფრით ძიუდოისტებს ექნებათ შესაძლებლობა, წარმოდგენილ კანდიდატებთან ერთად ჩაერთონ კონკურენციის პროცესში იმ სპორტსმენებთან ერთად, რომლებსაც აქვთ შანსი, მოხვდნენ მსოფლიოს ჩემპიონატზე;
• აღნიშნულ კანდიდატებთან ერთად დაიგეგმება ყველა მნიშვნელოვანი საკითხი ძიუდოისტების სამწვრთნელო პროცესთან მიმართებით;
• ქევხიშვილი მზადყოფნას გამოთქვამს, გასცეს ყველა კითხვაზე პასუხი და თუ გამოიკვეთება მისი მხრიდან რაიმე ხელისშემშლელი მომენტი, მზადაა დატოვოს შეთავაზებული თანამდებობა.

ძიუდოისტების პროტესტი

ძიუდოს ნაკრების რამდენიმე წევრი, გუნდის კაპიტან ვარლამ ლიპარტელიანთან ერთად ფედერაციის პრეზიდენტის, დავით ქევხიშვილის გადადგომას ითხოვს. ძიუდოისტები ქევხიშვილის გადადგომის მოთხოვნის მიზეზს, ერთი მხრივ, ნაკრების წარუმატებლობასა და მეორე მხრივ, ფედერაციაში არსებულ მძიმე და უსიამოვნო სიტუაციას უკავშირებენ.

სპორტსმენები აცხადებენ, რომ თუ დავით ქევხიშვილი არ გადადგება, ისინი საერთაშორისო ტურნირებში მონაწილეობას აღარ მიიღებენ. როგორც ქევხიშვილის ამბობს, ის გადადგომას არ აპირებს.

აპრილის ბოლოს ევროპის ჩემპიონატიდან უმედლოდ დაბრუნების შემდეგ ძიუდოს ნაკრების მთავარმა მწვრთნელმა, ირაკლი ცირეკიძემ გუნდი დატოვა, გადადგა მთელი სამწვრთნელო შტაბი.

კულტურისა და სპორტის მინისტრმა, მიხეილ გიორგაძემ თქვა, რომ ფედერაციაში არსებული პრობლემის შესასწავლად სამინისტროს, პარლამენტის სპორტის კომიტეტისა და ოლიმპიური კომიტეტის ერთობლივი კომისია შეიქმნა. მისივე განმარტებით, კომისიამ უკვე გამოითხოვა ფედერაციიდან ინფორმაცია და მისი შესწავლის შემდეგ შედეგები გასაჯაროვდება.

10 მაისს ხმაურით ჩაიარა ძიუდოს ფედერაციის ყრილობამ. ძიუდოს ფედერაციის პრეზიდენტის, დავით ქევხიშვილის განმარტებით, მან დღემდე ვერ მოისმინა არგუმენტი რატომ უნდა გადადგეს. მისივე თქმით, ულტიმატუმების გზით პროცესის წაყვანა არ შეიძლება და პასუხისმგებლობა ყველამ უნდა აიღოს.