კლუბ ბასიანის დაგეგმილი 27 მაისის აქციის ღონისძიება "ბრძოლა ბასიანისთვის" ფეისბუქზე წაშლილია. ცოტა ხნის წინ კლუბის ფეისბუქ გვერდზე გაავრცელეს განცხადება, სადაც ნათქვამია, რომ ეს ორგანიზატორებისგან დამოუკიდებლად მოხდა:

"მეგობრებო გაურკვეველი მიზეზით და ორგანიზატორებისგან დამოუკიდებლად 27 მაისის ღონისძიება “ბრძოლა ბასიანისთვის” წაიშალა. გვიჭირს წინასწარ ვინმეს დადანაშაულება და ხელის დადება, ვცდილობთ გამოვიკვლიოთ, თუ რა მოხდა და რაშია საქმე".

კლუბის ერთ-ერთი დამფუძნებელი, ტატო გეთია ფეისბუქის საკუთარ გვერდზე წერს, რომ ღონისძიების გვერდი მაშინ წაიშალა, როდესაც გუნდი მოვლენების ანალიზსს აკეთებდა:

"გახსენით დახურული კარი, დაგვაბრუნეთ სახლში", - ამ მოთხოვნით 27 მაისს, 18 საათზე კლუბ ბასიანის თანამშრომლებმა და მხარმდაჭერებმა, ევროპის მოედანზე, აქცია დაგეგმეს. კლუბის კარი დღეს, 23 მაისს გაიხსნა, თუმცა გუნდს მოგვიანებით, ერთობლივად უნდა გადაეწყვიტა, გააუქმებდნენ თუ არა დაგეგმილ პროტესტს.

შინაგან საქმეთა სამინისტრომ დღეს კლუბ ბასიანს ლუქი მოხსნა. მათი განცხადებით, კლუბში დასრულებულია საგამოძიებო მოქმედებები.

11 მაისს გვიან ღამით შსს-მ სპეცოპერაცია ჩაატარა და ნარკორელიზატორობის ბრალდებით რვა პირი დააკავა. რამდენიმე საათში კი პოლიცია ბასიანში, კაფე გალერისა და ბლოუ-ბარში შევიდა, კლუბის სტუმრები გარეთ გაიყვანა და შენობების ჩხრეკა დაიწყო.

ბასიანთან და გალერისთან პოლიციელებს, სპეცრაზმელებსა და მოქალაქეებს შორის სიტყვიერი და ფიზიკური დაპირისპირება მოხდა. სამართადამცავების მოთხოვნის დაუმორჩილებლობისთვის 50-მდე პირი დააკავეს.

12 მაისს ღამით განვითარებულმა მოვლენებმა პარლამენტთან საპროტესტო აქციები გამოიწვია.