კაფე გალერი დღეიდან დალუქული აღარ არის. ამის შესახებ On.ge-ს ინფორმაცია კლუბში დაუდასტურეს. როგორც მათ აღნიშნეს, სტუმრებს მას შემდეგ მიიღებენ, რაც შენობას მოაწესრიგებენ.

შინაგან საქმეთა სამინისტრომ On.ge-ს უთხრა, რომ კლუბი ბასიანი ამ დრომდე დალუქულია და ამ ეტაპზე უცნობია როდის გაიხსნება.

11 მაისს გვიან ღამით შსს-მ სპეცოპერაცია ჩაატარა და ნარკორელიზატორობის ბრალდებით რვა პირი დააკავა. დაკავებულებს შორის კაფე გალერის დაცვის სამსახურის უფროსიც იყო. რამდენიმე საათში კი პოლიცია ბასიანში, კაფე გალერისა და ბლოუ-ბარში შევიდა, კლუბის სტუმრები გარეთ გაიყვანა და შენობების ჩხრეკა დაიწყო.

შინაგან საქმეთა სამინისტრო გავრცელებულ განცხადებაში აღნიშნული იყო, რომ სპეცოპერაციას წინ 3-თვიანი საგამოძიებო მოქმედებები უძღვოდა და მათ ნარკორეალიზების ბრალდებით რვა პირი დააკავეს.

12 მაისს ღამით განვითარებულმა მოვლენებმა პარლამენტთან საპროტესტო აქციები გამოიწვია.

როგორც მინისტრის მოადგილე, ნათია მეზვრიშვილი ამბობს, ბასიანსა და გალერიში ნარკოტიკული საშუალებები იყიდებოდა და პოლიციის მიერ საგამოძიებო მოქმედებების ჩატარება ლეგიტიმური იყო. მისივე განმარტებით, პოლიცია მოქმედებდა კანონის ჩარჩოებში.

შს მინისტრის, გიორგი გახარიას თქმით, 12 მაისს კლუბებში სპეცოპერაცია ნარკორეალიზატორთა დასაკავებლად არ ჩატარებულა. მისივე თქმით, მათი მიზანი რეალიზატორებსა და კლუბის ინფრასტრუქტურას შორის კავშირის დადგენა იყო.

გაიგეთ მეტი: