ძიუდოისტების ნაწილმა ფედერაციის პრეზიდენტის, დავით ქევხიშვილის კაბინეტის კარები აჭედა. სპორტსმენები მის გადადგომას მოითხოვენ. ამასთანავე, ძიუდოისტებმა ქევხიშილის კაბინეტიდან მისი სავარძელი გამოიტანეს და ნაგავში გადააგდეს.

ნაკრების კაპიტანმა, ვარლამ ლიპარტელიანმა რუსთავი 2-ს განუცხადა, რომ ფედერაციასთან პროტესტი გრძელდება და ისინი უცვლელად ქევხიშვილის გადადგომას მოითხოვენ. გარდა ამისა, სპორტსმენები უნდობლობას უცხადებენ კომისიას, რომელიც ფედერაციაში მიმდინარე დაპირისპირების შესასწავლად შეიქმნა.

ლიპარტელიანი ამბობს, რომ ძიუდოისტები უკვე 20 დღეა აღარ ვარჯიშობენ და გააგრძელებენ პროტესტს, სანამ მათი მოთხოვნები არ შესრულდება.

ძიუდოისტების პროტესტი

ძიუდოს ნაკრების რამდენიმე წევრი, გუნდის კაპიტან ვარლამ ლიპარტელიანთან ერთად ფედერაციის პრეზიდენტის, დავით ქევხიშვილის გადადგომას ითხოვს. ძიუდოისტები ქევხიშვილის გადადგომის მოთხოვნის მიზეზს, ერთი მხრივ, ნაკრების წარუმატებლობასა და მეორე მხრივ, ფედერაციაში არსებულ მძიმე და უსიამოვნო სიტუაციას უკავშირებენ.

სპორტსმენები აცხადებენ, რომ თუ დავით ქევხიშვილი არ გადადგება, ისინი საერთაშორისო ტურნირებში მონაწილეობას აღარ მიიღებენ. როგორც ქევხიშვილის ამბობს, ის გადადგომას არ აპირებს.

აპრილის ბოლოს ევროპის ჩემპიონატიდან უმედლოდ დაბრუნების შემდეგ ძიუდოს ნაკრების მთავარმა მწვრთნელმა, ირაკლი ცირეკიძემ გუნდი დატოვა, გადადგა მთელი სამწვრთნელო შტაბი.

კულტურისა და სპორტის მინისტრმა, მიხეილ გიორგაძემ თქვა, რომ ფედერაციაში არსებული პრობლემის შესასწავლად სამინისტროს, პარლამენტის სპორტის კომიტეტისა და ოლიმპიური კომიტეტის ერთობლივი კომისია შეიქმნა. მისივე განმარტებით, კომისიამ უკვე გამოითხოვა ფედერაციიდან ინფორმაცია და მისი შესწავლის შემდეგ შედეგები გასაჯაროვდება.

10 მაისს ხმაურით ჩაიარა ძიუდოს ფედერაციის ყრილობამ. ძიუდოს ფედერაციის პრეზიდენტის, დავით ქევხიშვილის განმარტებით, მან დღემდე ვერ მოისმინა არგუმენტი რატომ უნდა გადადგეს. მისივე თქმით, ულტიმატუმების გზით პროცესის წაყვანა არ შეიძლება და პასუხისმგებლობა ყველამ უნდა აიღოს.