მთავარმა პროკურატურამ, სამსახურებრივი მდგომარეობის გამოყენებით, დიდი ოდენობით სხვისი ფულადი თანხის თაღლითურად დაუფლების ბრალდებით საპატრულო პოლიციის ინსპექტორი დააკავა.

გამოძიების ვერსიით, პოლიციელმა თავისი ორი ნაცნობი დაარწმუნა, თითქოს ის ახლო ურთიერთობაში იყო რეგიონალური სამმართველოს ხელმძღვანელ პირებთან და საოლქო პროკურატურის პროკურორთან.

პროკურატურის ცნობით, პოლიციელი ნაცნობებს დაჰპირდა, რომ საჯარიმო ავტოსადგომიდან გამოიყვანდა და მათ დაუბრუნებდა ერთ-ერთ სისხლის სამართლის საქმეზე ნივთმტკიცებად ამოღებულ ნათესავების კუთვნილ ავტომანქანებს:

"თითქოსდა აღნიშნული თანამდებობის პირებისთვის გადასაცემად იგი თაღლითური გზით დაეუფლა 6 400 აშშ დოლარისა და 4 000 ლარის ოდენობით ფულად თანხებს ".

ბრალდებული სასამართლოს განჩინებით, 2018 წლის 21 მაისს დააკავეს.

გამოძიება მიმდინარეობს სისხლის სამართლის კოდექსის 180-ე მუხლის მე-3 ნაწილის ა და ბ ქვეპუნქტებით, რაც სასჯელის სახედ და ზომად 6-დან 9 წლამდე ვადით თავისუფლების აღკვეთას ითვალისწინებს.