ფემინისტების დამოუკიდებელი ჯგუფის განცხადებით, 17 მაისს დაგეგმილ ონლაინკამპანიაზე, სახელწოდებით, check in რუსთაველზე, კიბერთავდასხმა განხორციელდა. აღნიშნულ ინფორმაციას ორგანიზაცია ფეისბუქზე აქვეყნებს.

ფემინისტების დამოუკიდებელი ჯგუფი წერს, რომ გუშინ, 2018 წლის 17 მაისს, შექმნეს ფეისბუქ გვერდი "საქართველოს წმინდა პარლამენტი", სადაც ზუსტად 19:00-ზე მხარდამჭერებს check in-ის გაკეთება სთხოვეს.

"აქციამდე, ანუ 19:00 საათამდე 5 წუთით ადრე, გვერდი "საქართველოს წმინდა პარლამენტი" უბრალოდ გაქრა. ამავდროულად, ჯგუფის 2 წევრს დაებლოკა ფეისბუქის პირადი ანგარიში და მხოლოდ გარკვეული პერიოდის შემდეგ, დაბრკოლებითა და შეფერხებით მოახერხეს ფეისბუქზე შესვლა", - ნათქვამია განცხადებაში.

ფემინისტების დამოუკიდებელი ჯგუფის ინფორმაციით, იმავე დღის 19:00-დან დაახლოებით 40 წუთის გასვლის შემდეგ ფეიჯი განახლდა, თუმცა, შეუძლებელი იყო მისი პოსტების გადაზიარება.

"საბოლოოდ აღმოჩნდა, რომ გვერდის სპეციფიკაციებში გამოქვეყნების სტატუსი იყო გამოცვლილი და გვერდს მხოლოდ შემქმნელები ხედავდნენ. მას შემდეგ, რაც ეს ხარვეზი გასწორდა, ჯგუფის წევრებმა ფემინისტების დამოუკიდებელი ჯგუფის ოფიციალური გვერდიდან ისევ განვაახლეთ ონლაინ კამპანიის ანონსის გაზიარება", - ვკითხულობთ ორგანიზაციის ფეისბუქზე.

ფემინისტების დამოუკიდებელი ჯგუფი ისევ მოუწოდებს აქტივისტებს ჩაერთონ კამპანიაში და დღესაც დაჩექინდნენ პარლამენტთან.

ფემინისტების დამოუკიდებელი ჯგუფის განცხადების შესახებ დეტალების დაზუსტებას On.ge შსს-ში ცდილობს.