არასასურველი კომუნიკაცია, შეურაცხყოფა და მუქარა - თბილისის საქალაქო სასამართლომ ადევნებისთვის კაცს 9-თვიანი პატიმრობა შეუფარდა. ამით სასამართლომ პროკურატურის მიერ წარდგენილი მტკიცებულებები გაითვალისწინა. ამის შესახებ ინფორმაციას პროკურატურა ავრცელებს.

"დადგინდა, რომ პირი სოციალური ქსელისა და სხვა ელექტრონული საშუალებების გამოყენებით ცდილობდა ქალთან მისთვის არასასურველი კომუნიკაციის დამყარებას და უკანონო თვალთვალს, აკითხავდა სხვადასხვა ადგილებში და მის გაკონტროლებას ცდილობდა. ასევე კაცმა დაზარალებულს არაერთხელ მიაყენა სიტყვიერი შეურაცხყოფა და ემუქრებოდა, რომ ყველგან ნახავდა და მის ქცევას გააკონტროლებდა. აღნიშნული ქმედების შედეგად ქალი მუდმივად განიცდიდა შეურაცხყოფას, დამცირებასა და შანტაჟს, რაც იწვევდა მის ტანჯვას და მუდმივი თვალთვალის გამო ვერ ახერხებდა თავისუფლად გადაადგილებას", - აღნიშნულია პროკურატურის მიერ გავრცელებულ განცხადებაში.

მათივე ინფორმაციით, დამნაშავე 2018 წლის 11 თებერვალს დააკავეს. დაკავებულს ბრალი სისხლის სიმართლის კოდექსის 1511 მუხლის (ადევნება) პირველი ნაწილით წაეყენა და აღკვეთის ღონისძიებად პატიმრობა შეეფარდა.