პრემიერ-მინისტრს, გიორგი კვირიკაშვილს საგანგებო ბრიფინგზე 12 მაისის სპეცოპერაციასთან დაკავშირებით განმარტება არ გაუკეთებია.

ბრიფინგზე პრემიერმა განაცხადა, რომ გუნდში ბოლო ორი დღის განმავლობაში მიმდინარე მოვლენები განიხილეს.

"კახა კალაძემ ჩვენი გუნდის სახელით გააკეთა განცხადება, სადაც მკაფიოდ იქნა გამოხატული ჩვენი პოზიცია დღევანდელ აქტუალურ საკითხებთან დაკავშირებით და მოუწოდა ყველას - ჩვენს ახალგაზრდებს, ჩვენს საზოგადოებას გაერთიანებისკენ იმ უმძიმეს დანაშაულთან ბრძოლაში, რასაც ნარკოტიკების რეალიზაცია ჰქვია და რასაც ბოლო პერიოდში არაერთი ადამიანის, არაერთი ახალგაზრდის სიცოცხლე შეეწირა".

მისივე თქმით, სახელმწიფოს ექნება ერთი მხრივ ნარკორეალიზატორების მიმართ მკაცრი პოზიცია და იქნება გაცილებით უფრო ჰუმანური მომხმარებლების მიმართ.

" მე ვარ იმის გარანტი, რომ დღეს, ჩვენს ქვეყანაში თქვენი სიტყვისა დაგამოხატვის თავისუფლებას არაფერი დაემუქრება. სწორედ ეს არის ერთ-ერთი იმ უდიდეს მონაპოვართაგანი, რომლითაც ჩვენიხელისუფლება, თითოეული ჩვენგანი სრულიად სამართლიანად ამაყობს. რა თქმა უნდა, ეს უპირველეს ყოვლისა, თქვენი მონაპოვარიც არის, ყველა თქვენგანის. ის, რომ ადამიანი, სიტყვისა და გამოხატვის თავისუფლების უზრუნველყოფა ჩვენიპრიორიტეტია, გასული საათების მანძილზეც დადასტურდა", - განაცხადა პრემიერმა.

პრემიერის თქმით, საზოგადოების დაპირისპირება მიუღებელია:

"კიდევ ერთხელ მოგმართავთ თხოვნით, შევინარჩუნოთ ერთიანობა ერთი საერთო მიზნის გარშემო, იმ მიზნისა, რომელსაც ჰქვიაჩვენი ქვეყნის ხვალინდელი დღე, ჩვენს ახალგაზრდებზე, მომავალ თაობაზე ზრუნვა და მათი სიცოცხლის დაცვა. ნუ დავუშვებთსიძულვილს განსხვავებული მოსაზრებების გამო. გავერთიანდეთ ადამიანების სიცოცხლისა და ჩვენი ქვეყნის მომავლის დასაცავად!"

პარლამენტთან აქცია "ჩვენი სიცოცხლისთვის" ორგანიზატორები 12 მაისის მოვლენების შემდეგ პრემიერ-მინისტრისგან კითხვებზე პასუხის გაცემას ითხოვენ.

გუშინ კი ორგანიზატორები პრემიერ-მინისტრისა და შინაგან საქმეთა მინისტრის გადადგომას ითხოვდნენ.

12 მაისს გვიან ღამით კლუბ ბასიანსა და კაფე გალერიში სპეცოპერაცია ჩატარდა. შინაგან საქმეთა სამინისტროს განცხადებით, მათ რვა ნარკორეალიზატორი დააკავეს. სპეცოპერაციის პარალელურად დაპირისპირება იყო პოლიციასა და მოქალაქეებს შორის. ადმინისტრაციული წესით დააკავეს 50-მდე პირი, ისინი გუშინ დილითვე გაათავისუფლეს.

სპეცოპერაციაზე განცხადება გააკეთა თბილისის მერმა, კახა კალაძემ:

"არავის ვთავაზობ შესარიგებელ მატჩს. მე გთავაზობთ, ჩემო მეგობრებო, ჩემი დებო და ძმებო, მე ვიცი, რომ ჩემდამი გააჩნიათ გარკვეული პატივისცემა, რასაც ვაფასებ, მე გთავაზობთ ერთად ვებრძოლოთ ნარკოტრეფიკს, ნარკორეალიზატორებს".

კალაძემ აღნიშნა ისიც, რომ სპეკულირებაა თითქოს 12 მაისის სპეცოპერაცია იქნება დარტყმა ღამის ეკონომიკაზე და კლუბურ მუსიკაზე.