სამხრეთ გერმანიის ქალაქ ვურცბურგში, პირი რომელიც მატარებელში ნაჯახით შეიჭრა და მგზავრებს დაზიანება მიაყენა ე.წ. ისლამური სახელმწიფოს მებრძოლი იყო. ამის შესახებ ტვიტერზე დაზვერვის სამსახური SITE Intel Group წერს, ისლამური სახელმწიფოს საინფორმაციო სააგენტოს წყაროზე დაყრდნობით:

ნაჯახით შეიარაღებული პირი, წარმოშობით ავღანელი ლტოლვილი იყო. BBC-ის ცნობით, ტერორისტის ოთახში სამართალდამცავებმა ხელით დახატული ე.წ. ისლამური სახელმწიფოს დროშა იპოვეს.

შემთხვევა საფრანგეთის ქალაქ ნიცაში მომხდარი თავდასხმიდან, რამდენიმე დღეში მოხდა. მასზე პასუხისმგებლობა ტერორისტულმა დაჯგუფება ისლამურმა სახელმწიფომ აიღო.

18 ივლისს, ადგილობრივი დროით 21:15 საათზე, დანითა და ნაჯახით შეიარაღებული პირი გერმანიის ქალაქ ვურცბურგში მატარებელში შეიჭრა და რამდენიმე ადამიანს სერიოზული დაზიანებები მიაყენა. ამ დროისთვის ცნობილია, რომ დაშავებულია 4 მგზავრი. როგორც შს მინისტრი აცხადებს, მათ შორის სამი კრიტიკულ მდგომარეობაშია, ერთმა კი მსუბუქი დაზიანება მიიღო.

ბავარიის შინაგან საქმეთა მინისტრის თქმით, თავდამსხმელი შემთხვევის ადგილიდან გაქცევას ცდილობდა, როდესაც პოლიციელებმა ესროლეს და მოკლეს.