საქართველოს პირველი დემოკრატიული რესპუბლიკის დაარსებიდან წელს 100 წელი გავა, შესაბამისად, წელს, როგორც არასდროს, მნიშვნელოვანია იმ გარემოებებისა თუ ისტორიული პირობების ცოდნა, რომელთა ფონზეც ჩვენმა ქვეყანამ დამოუკიდებლობა მოიპოვა.

თუ Facebook-ზე სიახლეების ველში მარო მაყაშვილის მიერ დამატებული Life Event (მნიშვნელოვანი მოვლენა) ან ნოე ჟორდანიას მიერ დაწერილი პოლიტიკური ანალიზი შეგხვდათ, არ იფიქროთ, რომ მოგეჩვენათ. გასული საუკუნის ისტორიის გმირები ციფრული ფორმით დაგვიბრუნდნენ, რათა შეგვახსენონ, რა არის საქართველოსთვის მთავარი.

გაინტერესებთ, რას წერს ივანე ჯავახიშვილი სასწავლებლის დაარსებაზე ან როგორ ეძებს შროდერის როიალს ზაქარია ფალიაშვილი? მაშინ პროექტის ფარგლებში შექმნილ გვერდებს ყურადღებით უნდა ადევნოთ თვალი.

ფეისბუქზე გაცოცხლებული მთავარი პერსონაჟები: ნოე ჟორდანია, ნოე რამიშვილი, ექვთიმე თაყაიშვილი, გიორგი კვინიტაძე, აკაკი ჩხენკელი, მარო მაყაშვილი, ქრისტინე შარაშიძე, ზაქარია ფალიაშვილი, სანდრო ახმეტელი და ივანე ჯავახიშვილი თავიანთ და ქვეყნის 100 წლის წინანდელ ისტორიას ისე გვიზიარებენ, როგორც ჩვენ და ჩვენი მეგობრებს გვჩვევია. ისინი Facebook-ის რიგითი მომხმარებლებივით დარდობენ ქვეყნის ბედზე და გამოხატავენ სიყვარულს, სიხარულს, აღშფოთებასა თუ წუხილს.

გაცოცხლებული ისტორია დამოუკიდებლობის დღისთვის მიძღვნილი მარკეტინგული კამპანიის ერთ-ერთი მთავარი კომპონენტია. ისტორიული პერსონაჟების სოციალურ ქსელში გაცოცხლების იდეა მთავრობის ადმინისტრაციას ეკუთვნის, ხოლო იდეის განვითარებასა და განხორციელებაზე ლივინგსტონი მუშაობს. კამპანიის კონტენტის მოძიებასა და დამუშავებაშუ ისტორიკოს-მკვლევარებიც იყვნენ ჩართულები. სამუშაო ჯგუფის წევრები არიან: ჯაბა სამუშია, დოდო ჭუმბურიძე, გიორგი კალანდია და ლევან თაქთაქიშვილი. კამპანიაში გამოყენებული მასალა ეკუთვნის საქართველოს ეროვნულ არქივს, ეროვნულ მუზეუმს, პარლამენტის ეროვნულ ბიბლიოთეკას, ხელოვნების სასახლეს, ხელნაწერთა მუზეუმს და ლიტერატურის მუზეუმს.

ჩვენი წარსულის ისტორიის მთავარი გმირების Facebook-ზე დაბრუნება 100 წლისთავისადმი მიძღვნილი ციფრული კამპანიის მხოლოდ ერთი ნაწილია. იგეგმება ვებგვერდის შექმნაც, რომელიც თავს მოუყრის ისტორიულ ფოტოებს, მნიშვნელოვან თარიღებსა და მეოცე საუკუნის დასაწყისის უმნიშვნელოვანესი ადამიანების ბიოგრაფიებს.