ორშაბათს, 6 მაისს ბერლინის პოლიციამ ოფიციალურ Facebook გვერდზე ბერლინის ერთ-ერთ პარკში გამართული "წვეულების" ფოტოები დადო.

ბუნებაში გაღვივებული ნაკვერჩხლები, შამფურებზე წამოცმული 12 ცხვარი და 150 ადამიანი - ასე აღნიშნავდნენ ბოსნიელები მართლმადიდებლურ დღესასწაულს, გიორგობას.

პოლიციის განცხადებაში ნათქვამია:

"24 გრადუსი, მზე - შესანიშნავი ამინდი ბარბექიუსთვის.

სწორედ ასეთი დღე იყო, როცა ჩვენმა ერთმა გუნდმა რაციით შემდეგი ტექსტი მოისმინა:
"წადით ფოლკსპარკში ფრიდრიხშაინში. ადამიანებს ცხვრები ჰყავთ გატყავებული და შეამოწმეთ"

ადგილზე მისულ სამართალდამცავებს უცნაური სანახაობა დახვდათ: 150-მდე ადამიანი შეკრებილიყო, ბავშვები მშრალ ბალახზე გაღვივებულ ნაკვერჩხლებთან ძალიან ახლოს დარბოდნენ და ცეცხლზე ცხვრები ტრიალებდა.

პოლიციელებმა ცეცხლი მალევე ჩააქრეს და პასუხისმგებელი პირების მონაცემები ჩაიწერეს. მათი თქმით, ბოსნიელები თავს იმით იმართლებდნენ, რომ ეს მათი რელიგიური ტრადიციაა და დღესასწაულს ამ ფორმით უკვე 10 წელია, აღნიშნავენ"

უსაფრთხოების წესების დარღვევისთვის თითოეულ ზრდასრულ ადამიანს შესაძლოა 5000 ევრომდე ჯარიმა დაეკისროს.

პოლიცია განმარტავს, რომ პარკში ბარბექიუს ჭამა კანონით აკრძალული არაა, ისევე როგორც, მთლიანი ცხოველების შეწვა (რაც არ უნდა უცნაური სანახაობა იყოს ეს), მაგრამ აკრძალულია პირდაპირ მიწაზე ცეცხლის გაჩაღება - განსაკუთრებით მაშინ, თუ იქვე ელემენტებჩადგმული შამფურები ტრიალებს და ბავშვები დარბიან.

ამავე თემაზე: ფოტოკოლაჟი: მსხვერპლშეწირვა გორიჯვრის ეკლესიაზე