საგარეო საქმეთა სამინისტრო ადასტურებს, რომ საფრანგეთის ქალაქ ნიცაში, ტერორისტული თავდასხმის შედეგად საქართველოს მოქალაქე გარდაიცვალა.

უწყების ცნობით, 18 ივლისს, ფრანგულმა მხარემ ოფიციალურად დაადასტურა მიმდინარე წლის 14 ივლისს, ნიცაში განხორციელებული ტერორისტული აქტის დროს საქართველოს 1960 წელს დაბადებული მოქალაქის, რომან ეკმალიანის დაღუპვის შესახებ. სამინისტროს განცხადებით, რომან ეკმალიანი ბოლო წლების განმავლობაში ბელგიაში ცხოვრობდა.

საგარეო საქმეთა სამინისტრო ღრმა მწუხარებას გამოთქვამს მომხდარი ტერორისტული აქტის შედეგად საქართველოს მოქალაქის დაღუპვასთან დაკავშირებით და უსამძიმრებს გარდაცვლილის ოჯახს.

14 ივლისს ფრანგული ზღვისპირა ქალაქში 31 წლის ტუნისელი საბრძოლო მასალით დატვირთული სატვირთო მანქანით ხალხის მასაში შევარდა და თითქმის 2 კილომეტრი გაიარა. დაიღუპა 84 ადამიანი, მათ შორის არიან ბავშვებიც. ამასთან, 18 ადამიანი კრიტიკულადაა დაშავებული, 50-ზე მეტი ბავშვი კი საავადმყოფოშია გადაყვანილი.

აღნიშნულის გამო, საფრანგეთმა საგანგებო მდგომარეობა, რომელიც ივლისის ბოლოს უნდა დასრულებულიყო, კიდევ 3 თვით გააგრძელა.