ევროპა ლიგის ნახევარფინალიდან გამოვარდნის შემდეგ არსენალის მთავარმა მწვრთნელმა არსენ ვენგერმა აღნიშნა, რომ ძალიან იმედგაცრუებულია.

ფრანგმა სპეციალისტმა ერთი თვის წინ დაადასტურა, რომ სეზონის ბოლოს გუნდის დატოვებას აპირებდა, ამიტომ ახლა განსაკუთრებულად სურდა, რომ მისი და არსენალის "სასიყვარულო ისტორია" (როგორც თავად უწოდა), კარგად დასრულებულიყო. თუმცა, როგორც იცით, მადრიდში გამართულ შეხვედრაში ატლეტიკომ გაიმარჯვა და ფინალის საგზურიც სწორედ მადრიდულმა კლუბმა მოიპოვა.

"ძალიან იმედგაცრუებული ვარ. დროა, კლუბმა იმაზე იფიქროს, თუ რა იქნება მომდევნო სეზონში. ვფიქრობ გუნდში მაღალი დონის მოთამაშეები არიან და ზაფხულში რამდენიმე ფეხბურთელის დამატებით, ისინი სწორი მიმართულებით წასვლას მოახერხებენ".

"ამ მომენტისთვის არანაირი გეგმა არ მაქვს. ჯერ ეს უდიდესი იმედგაცრუება უნდა გადავლახო. ძალიან, ძალიან საწყენია, რომ კლუბის დატოვება ასეთ ნოტაზე მომიწევს", - განაცხადა არსენ ვენგერმა მატჩის შემდეგ.