5 მაისს, ქუთაისში, ეროვნული ლიგის მატჩზე სოციალური კამპანია — სიცოცხლის გულშემატკივარი დაიწყო, რომელშიც ქალაქის მთავარი საფეხბურთო კლუბი ტორპედო ერთვება და ისტორიულ დღესასწაულს, გვირილობას, მის პირვანდელ, სასიცოცხლოდ მნიშვნელოვან დანიშნულებას უბრუნებს.

გვირილობის დღესასწაული ქუთაისში 100 წელზე მეტს ითვლის და ისტორიულად, ის ტუბერკულოზთან ბრძოლას ეძღვნებოდა. საუკუნის წინ, ამ დღეს, გვირილების სანაცვლოდ დაავადებულთა დასახმარებლად თანხას აგროვებდნენ. დროთა განმავლობაში ტრადიციამ სახე იცვალა და დღეს ადამიანები ერთმანეთს უბრალოდ ყვავილებს ჩუქნიან.

ფოტო: ტორბედო ქუთაისი

საქართველოში ტუბერკულოზთან ბრძოლის კუთხით აშკარა პროგრესი გვაქვს, მაგრამ ჯანმო-ს ბოლო კვლევის მიხედვით, ევროპის წამყვან სახელმწიფოებთან შედარებით, ჩვენთან ავადობის მაჩვენებლები მაინც მაღალია.

დაავადება ხშირად სრულიად უსიმპტომოდ ვითარდება, თუმცა, მთავარი პრობლემა ინფორმაციის ნაკლებობაა. სპეციალისტები მიიჩნევენ, რომ ახლა მთავარი გამოწვევა საქართველოში არის დაავადების ირგვლივ გავრცელებული სტერეოტიპები და მითები, რაზეც ხმამაღლა საუბარია საჭირო. მით უმეტეს, რომ ამ დაავადების მკურნალობა სრულად უფასოა!

ამ პრობლემაზე ხმამაღლა სასაუბროდ ის სივრცე შეირჩა, სადაც ყველაზე მეტი ადამიანი იყრის თავს — სტადიონი.

ფოტო: ტორბედო ქუთაისი

5 მაისს, ტორპედოსა და რუსთავის მატჩისთვის:

  • შეიქმნა ტუბერკულოზთან ბრძოლის ახალი სიმბოლო, რომლითაც ფეხბურთელები მოედანზე გამოვიდნენ;
  • მეტოქე გუნდები გაერთიანდნენ საერთო ბანერისა და სამკლავურის უკან;
  • ფეხბურთელების თანმხლები ბავშვები მოედანზე გვირილებით ხელში გამოვიდნენ;
  • სტადიონის ადგილობრივი დიქტორისა და მატჩის პირდაპირი ტრანსლაციის კომენტატორის მეშვეობით, ათასობით მაყურებელმა პირდაპირ ეთერში გაიგო ამ მნიშვნელოვანი შინაარსის შესახებ;
  • კამპანიას ტორპედოს ფან-კლუბი ჯუნგლები შემოუერთდა და ტრიბუნაზე ბანერი გადმოკიდა.