თუ თავი მოუხერხებელი ადამიანი გგონიათ, გუშინ, ტექნოპარკში მომხდარი ამბავი თვითშეფასებას აგიმაღლებთ. გაჯეტების ბევრ მოყვარულს დაგვმართნია კოშმარი, როდესაც ახალი სმარტფონი შემთხვევით ხელიდან გაგვივარდა და ეკრანი გავტეხეთ. მერე გულში საკუთარ თავს დიდხანს ვლანძღავთ და რამდენიმე დღე იმაზე ვფიქრობთ, რა ჯანდაბამ გამოგვთიშა იმ ავადსახსენებელი 3 წამის განმავლობაში.

არ იდარდოთ, თქვენ მარტო არ ხართ. გუშინ სოციალურ ქსელებში გავრცელდა სამსუნგის Galaxy სერიის ახალი სმარტფონების პრეზენტაციაზე გადაღებული ვიდეო, რომლის ავტორიც მსახიობი ბახვა ბრეგვაძეა. ბახვა პრეზენტაციას ფეისბუქის ლაივ ვიდეოთი აშუქებდა. ტექნოპარკში შეკრებილ ასამდე ადამიანს წამყვანი Galaxy S9 და S9+-ის შესახებ უყვებოდა, რა დროსაც სცენიდან გადმოვარდა და იატაკზე გაიშხლართა. დიახ, ასეთ დაცემას ზუსტად „გაიშხლართა“ ქვია.

საბედნიეროდ პრეზენტატორი სერიოზულ ტრავმებს გადაურჩა, რასაც ვერ ვიტყვით ახალ სმარტფონზე, რომელსაც ძირს დავარდნისას ეკრანი გაუტყდა. წამყვანის სასარგებლოდ უნდა ითქვას, რომ მიუხედავად სცენაზე მისი მოუხერხებლობისა, ინციდენტიდან თავი მოხერხებულად დაიძვრინა და გატეხილი ტელეფონის ამბავი სამსუნგის უსაზღვრო ეკრანის გარანტიაზე საუბრით გადაფარა. გარანტიის პირობები სწორედ გატეხილ ეკრანს ეხება.

რა თქმა უნდა, წამყვანის დაცემა არც ქართულ ინტერნეტს გამოჰპარვია და ამ თემაზე უკვე შეიქმნა ძალიან სასაცილო ქუბები.