სომეხი დეპუტატის, ნიკოლ პაშინიანის ინფორმაციით, შეიარაღებული დაჯგუფება, რომელიც დღეს დილას ერევნის პოლიციას დაესხა თავს, შენობა აიღო და მძევლები აიყვანა, ქვეყნის პრეზიდენტის სერჟ სარგისიანის გადადგმომასა და ძალაუფლების ხალხისთვის გადაცემას ითხოვს. ამის შესახებ Ekhokavkaza იუწყება.

ამბოხებულებს ტყვედ პოლიციის თანამშრომლები ჰყავთ აყვანილი. როგორც საქართველოს დესპანი სომხეთში, მალხაზ მალაშხია რუსთავი 2-თან საუბარში აცხადებს, თავდასხმისას მოკლულია პოლიციის ერთი თანამშრომელი, ასევე დაჭრილია ორი პოლიციელი.

მისი განცხადებით, სომხეთის ხელისუფლების წარმომადგენლებმა უკვე დაიწყეს მოლაპარაკებები თავდამსხმელებთან, რის შედეგადაც 2 ტყვე გათავისუფლებულია. მისი თქმით, ქალაქში მშვიდი სიტუაციაა, პანიკა არ არის.

დღეს სომხეთის დედაქალაქში, ერებუნის რაიონში, შეიარაღებული დაჯგუფება სატვირთო მანქანებით პოლიციის ტერიტორიაზე შეიჭრა და შენობის აღება სცადა, რის შედეგადაც ერთი პირია გარდაცვლილი.

ამბოხებულების მთავარ მოთხოვნას სომხეთის ოპოზიციური სამოქალაქო ინიციატივის - დამფუძნებელი პარლამენტის კოორდინატორის, ჟირაირა სეფილიანის გათავისუფლებაა, რომელიც იარაღის უკანონო შეძენა-შენახვისათვის არის ბრალდებული.

გამოძიების ინფორმაციით, სეფელიანი შეიარაღებულ დაჯგუფებასთან ერთად აპირებდა შენობების, ტელეკომუნიკაციების, მათ შორის ერევნის სატელევიზიო ანძის დაკავებას.

მათივე ცნობით, დანაშაულებრივი ჯგუფი გეგმავდა ყარაბაღის კონფლიქტის ზონაში ვითარების ესკალაციას პროვოკაციების გზით.