თანასწორობის მოძრაობის აქტივისტებმა ადამიანის უფლებათა კომიტეტის სხდომაზე პლაკატები გაშალეს. მათ კითხვით მიმართეს კომიტეტის თავმჯდომარეს და მოითხოვეს ახსნა მიაჩნია თუ არა კომიტეტს ლგბტ პირთა უფლებები ადამიანის უფლებებად.

ამ ქმედებას კომიტეტის წევრებსა და აქტივისტებს შორის სიტყვიერი დაპირისპირება მოჰყვა. აქტივისტები კომიტეტის სოფო კილაძის გადადგომას ითხოვენ. კომიტეტის თავმჯდომარემ შესვენება გამოაცხადა.

დეპუტატებმა მოითხოვეს, რომ აქტივისტებს დარბაზი დაეტოვებინათ და ამისთვის მანდატურის სამსახურსაც მიმართეს. თანასწორობის მოძრაობის წევრებმა დარბაზი პროტესტის ნიშნად დატოვეს.

აქტივისტებმა კილაძისგან მოითხოვეს აეხსნა, რატომ აღარ აპირებს კომიტეტი 17 მაისის აღნიშვნას, როცა ეს გრძელვადიან გეგმაში ჰქონდათ გაწერილი.

"ლგბტ ადამიანების უფლებები არის თუ არა ადამიანის უფლებების სფეროს ნაწილი? ამ ადამიანებს ყოველდღიურად უწევთ დიდ ძალადობასთან და აგრესიასთან გამკლავება. ადამიანებს კლავენ თავიანთი სექსუალური იდენტობის გამო. ამის ფონზე თვლით თუ არა, რომ უმნიშვნელოა ჰომოფობიასთან ბრძოლის დღე?" - განაცხადა ანა სუბელიანმა.

გუშინ, 30 აპრილს ცნობილი გახდა, რომ ადამიანის უფლებათა კომიტეტი 17 მაისის, ჰომოფობიასთან და ტრანსფობიასთან ბრძოლის დღეს აღარ აღნიშნავს. თუმცა ეს კომიტეტის 2017-2020 წლების სამოქმედო გეგმაშია ჩაწერილი.

"ჩვენი ნებაა, გვინდა, აღვნიშნავთ, გვინდა - არა", - განუცხადა ლიბერალის ჟურნალისტს სოფო კილაძემ.

კილაძის განცხადების საპასუხოდ თანასწორობის მოძრაობამ პარლამენტთან აქცია მოაწყო და კილაძის გადადგომა მოითხოვა.

სოფო კილაძემ განაცხადა, რომ მას 17 მაისის აღნიშვნასთან დაკავშირებით ჰომოფობიური განცხადება არ გაუვრცელებია.

მისი თქმით, ყველა ადამიანს აქვს უფლება ჰქონდეს აზრი და გამოხატოს საკუთარი აზრი და ყველა ადამიანი დაცულია კანონით და კონსტიტუციით.

"ჩვენი მოვალეობაა დავიცვათ თითოეული ადამიანი, არანაირი ჰომოფობიური განცხადება არ გაკეთებულა. დემონსტრაციის გამართვის უფლება ყველას აქვს", - განაცხადა სოფიო კილაძემ.