ადამიანის უფლებათა კომიტეტის თავმჯდომარემ, სოფო კილაძემ განაცხადა, რომ მას 17 მაისის აღნიშვნასთან დაკავშირებით ჰომოფობიური განცხადება არ გაუვრცელებია.

მისი თქმით, ყველა ადამიანს აქვს უფლება ჰქონდეს აზრი და გამოხატოს საკუთარი აზრი და ყველა ადამიანი დაცულია კანონით და კონსტიტუციით.

"ჩვენი მოვალეობაა დავიცვათ თითოეული ადამიანი, არანაირი ჰომოფობიური განცხადება არ გაკეთებულა. დემონსტრაციის გამართვის უფლება ყველას აქვს", - განაცხადა სოფიო კილაძემ.

ამ საკითხზე სოფიო კილაძემ ჟურნალისტების დამატებით კითხვებს აღარ უპასუხა და განაცხადა: "მე დავასრულე".

თბილისში, პარლამენტის შენობის უკანა შესასვლელთან, თანასწორობის მოძრაობამ სოფიო კილაძის გადადგომის მოთხოვნის აქცია გამართა.

აქციის მონაწილე ანა სუბელიანი ამბობს, რომ კომიტეტს რამდენიმეწლიანი სამოქმედო გეგმით, 17 მაისი, ჰომოფობიასთან და ტრანსფობიასთან ბრძოლი საერთაშორისო დღე უნდა აღენიშნა.

გუშინ, 30 აპრილს, ცნობილი გახდა, რომ ადამიანის უფლებათა კომიტეტი 17 მაისს არ აღნიშნავს.

"ჩვენი ნებაა, გვინდა, აღვნიშნავთ, გვინდა - არა", - განუცხადა დეპუტატმა ლიბერალის ჟურნალისტს.

პარალელურად, პარლამენტთან მიმდინარეობდა კონტრაქცია, რომელიც ჰომოფობიური და ქსენოფობიური განცხადებებით გამოირჩეოდა. ერთ-ერთმა მონაწილე გურამ ფალავანდიშვილმა თანასწორობის მოძრაობის წევრებს კვერცხი ესროლა. პოლიციამ სამი პირი ხულიგნობის მუხლით დააკავა.

თანასწორობის მოძრაობის აქტივისტები ამ წუთებში პარლამენტში არიან და ადამიანის უფლებათა კომიტეტის სხდომას ესწრებიან.