ევროპული საქართველოს ერთ-ერთი ლიდერი ოთო კახიძე აცხადებს, რომ მათ პარტიას ერთიანი ნაციონალური მოძრაობისგან განსხვავებული დამოკიდებულება აქვს არჩევნების მიმართ.

ოთო კახიძე, მმართველი ძალის დასამარცხებლად გაერთიანებაზე, მიხეილ სააკაშვილის შეთავაზებას ფეისბუქის საკუთარ გვერდზე პასუხობს:

"მნიშვნელოვანია, რომ ხალხს არ მოვუსპოთ არჩევნების რწმენა, არ ვუთხრათ, რომ არჩევნებს აზრი არა აქვს, რომ შულერს არ უნდა მიუჯდე, რომ მაინც გააყალბებს, რომ არსებობს ხელისუფლების შეცვლის რაღაც სხვა სცენარი, გარდა არჩევნებისა. ამგვარი დამოკიდებულება თესავს უიმედობას, ქადაგებს უძლურებასა და უსუსურობას, რაც, საბოლოო ჯამში, უხანგრძლივებს ივანიშვილის რეჟიმს პოლიტიკურ სიცოცხლეს".

ოთო კახიძე წერს, რომ პარტია საპრეზიდენტო არჩევნებისთვის ემზადება:

"საბოლოოდ 2020-ში უნდა გავისტუმროთ ივანიშვილის ხელისუფლება, დემოკრატიულად, არჩევნების გზით".

ევროპული საქართველოს წევრის თქმით, პასუხისმგებლიანი ოპოზიციის ამოცანაა, ამომრჩეველთა იმ რაოდენობის მობილიზება, რომ უკანონო გზებმაც ვეღარ უშველოს ხელისუფლებას:

"ჩვენ ვიცით, რომ ივანიშვილი იყენებს ადმინისტრაციულ რესურსს, ქუჩას, სუსს, მოსყიდვას დაშინებას და სხვა უკანონო მეთოდებს. ევროპული საქართველო ახალი პარტიაა, არჩევნებში შარშან გამოვედით, დასაწყისისთვის კარგი შედეგიც ვაჩვენეთ, ახლა - ხონსა და ვანში ნდობა გამოგვიცხადა ამომრჩეველთა დაახლოებით 40%-მა, რაც 2016-17 წლებზე უკეთესი შედეგია. ეს გამოტოვებული არჩევნები იყო, რომელზეც ხელისუფლების ცვლილება არ წყდება, ამიტომ ოპოზიციური ელექტორატის გამოყვანა ძალიან რთულია. ამას თან ერთვოდა ოპოზიციის ნაწილის მხრიდან პროცესის ბოიკოტირება და ძახილი, რომ არჩევნებს აზრი არა აქვს".

საქართველოს ყოფილმა პრეზიდენტმა, მიხეილ სააკაშვილმა ევროპული საქართველოს კანდიდატს, გიგი უგულავას, თანაპარტიელებთან ერთად მასთან გაერთიანება შესთავაზა. სააკაშვილი ფიქრობს, რომ ოპოზიცია "შულერების მაგიდას" არ უნდა მიუჯდეს კარტის სათამაშოდ:

"ჩვენ მთავარ შულერს ეს მაგიდა უნდა ავუყირავოთ. სწორი ის იქნება, გიგიც და მისი თანაპარტიელებიც თუ შემოგვიერთდებიან შულერების ხელისუფლებიდან განდევნაში".

28 აპრილს რამდენიმე რვა ოპოზიციური პარტია მიხეილ სააკაშვილს ამსტერდამში შეხვდა. მათ საპრეზიდენტო არჩევნებისთვის ახალი მოძრაობის ჩამოყალიბებაზე ისაუბრეს.