საქართველოს ყოფილი პრეზიდენტი, მიხეილ სააკაშვილი ვანისა და ხონის შუალედური არჩევნების შედეგებს ფეისბუქის საკუთარ გვერდზე ეხმიანება და ევროპული საქართველოს კანდიდატს, გიგი უგულავას, თანაპარტიელებთან ერთად მასთან გაერთიანებას სთავაზობს:

"მე გამახარებდა გიგი უგულავას ვანი-ხონის არჩევნებში გამარჯვება, მაგრამ ამის 1% შანსიც კი არ არსებობდა", - წერს მიხეილ სააკაშვილი და მმართველ პარტიას "შულერებს" ადარებს:

"არ შეიძლება შულერების მაგიდას მიუჯდე კარტის სათამაშოდ. ჩვენ მთავარ შულერს ეს მაგიდა უნდა ავუყირავოთ. სწორი ის იქნება, გიგიც და მისი თანაპარტიელებიც თუ შემოგვიერთდებიან შულერების ხელისუფლებიდან განდევნაში".

პირველადი მონაცემებით, პარლამენტის შუალედურ არჩევნებში ვანისა და ხონის #54 მაჟორიტარულ საარჩევნო ოლქში ქართული ოცნების კანდიდატმა, გივი ჭიჭინაძემ ხმების 57,86 პროცენტი მოიპოვა და გაიმარჯვა. გიგი უგულავა ხმების რაოდენობით (38.38%) მეორე ადგილზე გავიდა.

უგულავას თქმით, ევროპულმა საქართველომ ვანში ორჯერ უფრო მეტი ხმა აიღო, ვიდრე რამდენიმე თვის წინ, ადგილობრივი თვითმმარველობის არჩევნებზე. მისივე ცნობით, გაუმჯობესებულია მათი მონაცემები ასევე ხონშიც.

28 აპრილს რამდენიმე ოპოზიციური პარტია მიხეილ სააკაშვილს ამსტერდამში შეხვდა. მათ საპრეზიდენტო არჩევნებისთვის ახალი მოძრაობის ჩამოყალიბებაზე ისაუბრეს.

მიხეილ სააკაშვილთან შეხვედრას ესწრებოდნენ:

  • მამუკა გამყრელიძე - ახალი ერთობა საქართველოსთვის;
  • მამუკა გიორგაძე - ჩვენები - სახალხო პარტია;
  • შოთა მალაშხია - ქრისტიან-კონსერვატიული პარტია;
  • ზურაბ ხარატიშვილი - სამოქალაქო ალიანსი თავისუფლებისთვის;
  • ნიკა მელია - ერთიანი ნაციონალური მოძრაობა;
  • ბაჩუკი ქარდავა - ეროვნულ დემოკრატიული პარტია;
  • პაატა დავითაია - საქართველოს ევროპელი დემოკრატები;
  • ნიკა მაჭუტაძე - სახელმწიფო ხალხისთვის.