საპარლამენტო უმრავლესობის ლიდერი, ქართული ოცნების დეპუტატი არჩილ თალაკვაძე ადასტურებს, რომ პოლიტსაბჭოს შემადგენლობაში ცვლილებები იქნება.

ამის შესახებ არჩილ თალაკვაძემ ტოკ-შოუ რეაქციაში განაცხადა.

"პოლიტსაბჭოსთვის ხელახალი ლეგიტიმაცია პარტიის წესდებითაა გათვალისწინებული. დაგიდასტურებთ, რომ პოლიტსაბჭოს შემადგენლობა განახლდება, როგორი იქნება ახალი შემადგენლობა, რომელიც ადამიანები დატოვებენ მას და ვინ შევა ახალ პოლიტსაბჭოში, უახლოეს მომავალში, კონსულტაციების დასრულების შემდეგ მოგაწვდით ინფორმაციას", - განაცხადა არჩილ თალაკვაძემ.

დღეს, 26 აპრილს, პრემიერმა გიორგი კვირიკაშვილმა განაცხადა, რომ პარტიის დამფუძნებელი, ბიძინა ივანიშვილი ქართული ოცნების თავმჯდომარე გახდება.

ბიძინა ივანიშვილმა ქართული ოცნება 2012 წელს დააფუძნა და პირველი ოქტომბრის საპარლამენტო არჩევნებით, პოლიტიკურმა ძალამ ერთიანი ნაციონალური მოძრაობის მმართველობა ჩაანაცვლა.

2015 წელს, ბიძინა ივანიშვილი გურია NEWS-თან ინტერვიუში ამბობდა, რომ იმ შემთხვევაში დაბრუნდებოდა, თუ რაიმე საოცრება მოხდებოდა ხელისუფლებაში.