პოლიტოლოგი, გია ნოდია ბიძინა ივანიშვილის პოლიტიკაში დაბრუნებას მარცხის აღიარებად მიიჩნევს. მისი შეფასებით, ივანიშვილმა სისუსტე გამოიჩინა. ამის შესახებ ნოდიამ ფეისბუქ გვერდზე დაპოსტა.

მისივე თქმით, ეს ნაბიჯი ადასტურებს, რომ მმართველობის ის მოდელი, რაც მან პარტიას და ხალხს შესთავაზა: სახელმწიფოზე კონტროლის შენარჩუნება მიმდინარე მმართველობის მენეჯერებზე გადაბარებით - არაეფექტურია.

ნოდიას თქმით, ივანიშვილის დაბრუნება არის იმის აღიარებაც, რომ „არაფორმალური მმართველობის“ ბრალდებები სიმართლე იყო.

"ფაქტიურად, ხდება არაფორმალური მმართველობის ერთი მოდელის შეცვლა მეორით, თუმცა შედარებით უფრო გამჭვირვალით. პრემიერი ისევ არ არის ნამდვილი პრემიერი, ის უბრალო მენეჯერია, ქვეყანას პარტიის ლიდერი ხელმძღვანელობს. ეს ადრეც ვიცოდით, ახლა ეს უფრო თვალსაჩინო ხდება."

ნოდია წერს, რომ საბოლოოდ, ივანიშვილს მითოლოგიური საბურველი ეცლება და ეს მისთვის მომგებიანი არ არის.

დღეს, 26 აპრილს, პრემიერმა გიორგი კვირიკაშვილმა განაცხადა, რომ პარტიის დამფუძნებელი, ბიძინა ივანიშვილი ქართული ოცნების თავმჯდომარე გახდება.

ბიძინა ივანიშვილმა ქართული ოცნება 2012 წელს დააფუძნა და პირველი ოქტომბრის საპარლამენტო არჩევნებით, პოლიტიკურმა ძალამ ერთიანი ნაციონალური მოძრაობის მმართველობა ჩაანაცვლა.

2015 წელს, ბიძინა ივანიშვილი გურია NEWS-თან ინტერვიუში ამბობდა, რომ იმ შემთხვევაში დაბრუნდებოდა, თუ რაიმე საოცრება მოხდებოდა ხელისუფლებაში.