პარტია ქართული ოცნების წევრი, დეპუტატი გია ვოლსკი ამბობს, რომ ბიძინა ივანიშვილის პოლიტიკაში ოფიციალური დაბრუნება პარტიაში არსებულ კრიზისს არ უკავშირდება.

მისი თქმით, პარტიას გაძლიერება სჭირდება და სწორედ ამ მიზნით გააგრძელებს საქმიანობას ბიძინა ივანიშვილი ქართული ოცნების თავმჯდომარის პოზიციაზე.

"სიტყვა კრიზისი ძალიან შორს არის იმ რეალობიდან, რაც დღეს გაგვაჩნია. პარტია ბოლო პერიოდში, როგორც წინასაარჩევნო პარტია ისე ჩამოყალიბდა, რაც ჩვენთვის მიუღებელია. ამას სხვადასხვა მიზეზები აქვს, მაგრამ მთავარი მიზეზი არის ის, რომ პრემიერ-მინისტრი, როგორც პარლამენტის თავმჯდომარე და გენერალური მდივანი მნიშვნელოვნად არიან დატვირთულები საკმაოდ სერიოზული საკითხებით, რომელიც ჩვენს წინაშე დგას", - უთხრა On.ge-ს გია ვოლსკიმ.

კითხვაზე, შესაძლებელია თუ არა პარტია ქართულ ოცნებაში ბიძინა ივანიშვილის დაბრუნებას საკადრო ცვლილებები მოჰყვეს, გია ვოლსკი პასუხობს, რომ ამის წინაპირობა არ არსებობს.

"არანაირი წინაპირობა საიმისოდ, რომ რაიმე ცვლილებები განხორციელდეს ან პარტიაში ან მთავრობის შემადგენლობაში, არ არსებობს. პარლამენტში საკმაოდ მყარი პოზიცია გვაქვს. ცვლილებები და სტაბილურობა მოარული ხმების საპირისპიროდ - ასე შეგიძლიათ უწოდოთ ამ ცვლილებას", - განაცხადა გია ვოლსკიმ.

დეპუტატის თქმით, ბიძინა ივანიშვილი არც საპრეზიდენტო კანდიდატად არ განიხილება და მისი დაბრუნება საპრეზიდენტო არჩევნებს არ უკავშირდება.

ბიძინა ივანიშვილი ისევ ქართული ოცნების თავმჯდომარე იქნება. ამის შესახებ საქართველოს პრემიერ-მინისტრმა გიორგი კვირიკაშვილმა საგანგებო ბრიფინგზე განაცხადა.

ბიძინა ივანიშვილი პოლიტიკიდან 2013 წელს წავიდა. ქართული ოცნება-დემოკრატიული საქართველოს ლიდერის პოსტზე ბიძინა ივანიშვილ მაშინ ირაკლი ღარიბაშვილმა შეცვალა.

მაშინ ივანიშვილმა პოსტის დატოვებას, არა პოლიტიკიდან წასვლა, არამედ უფრო რთულ და საზოგადოებისთვის საჭირო ადგილას გადასვლა უწოდა. ის ამბობდა, რომ სამოქალაქო სექტორის განვითარებისთვის, აქტიურ საზოგადოებრივ ცხოვრებას უბრუნდებოდა, სადაც მინიმუმ 20 წლის განმავლობაში აპირებდა დარჩენას.