ტელეკომპანია კავკასიის ეთერში ემზარ კვიციანმა კოდორის ხეობაში მიმდინარე პროცესები გაიხსენა. დეპუტატმა განაცხადა, რომ რუსულ საინფორმაციო საშუალებებში რუსული სპეცსამსახურების დავალებით იტყუებოდა, როცა სპეცოპერაციაში ამერიკელების მონაწილეობაზე საუბრობდა.

"ოჯახი იყო რუსეთში გატყუებული, მე სად წავიდოდი, გარდა იმისა, სადაც ჩემი ოჯახი იყო. სხვა წასასვლელი მქონდა სადმე? მე შემეძლო ვერტმფრენის წამოყვანა და წამოსვლა, მაგრამ სად წავიდოდი? ჩემთვის მთავარ იყო ქმედებები არ შემოეთავაზებინათ, თორემ განცხადება ჩემთვის არაფერი იყო, იმიტომ რომ ოჯახი მყავდა გადასარჩენი არჩევანი უნდა გამეკეთებინა. იმ განცხადებებით ჩემს სამშობლოს არაფერი ვავნე, ამით მე ვავნე ჩემს თავს", - განაცხადა ემზარ კვიციანმა.

ედუარდ შევარდნაძის პრეზიდენტობის პერიოდში ემზარ კვიციანი მისი სპეციალური რწმუნებული იყო კოდორის ხეობაში. ვარდების რევოლუციის პერიოდში გადადგა და იმჟამინდელ ხელისუფლებას დაუმორჩილებლობა გამოუცხადა. დაახლოებით 200 თანამოაზრესთან ერთად კვიციანი კოდორის ხეობას აფარებდა თავს.

გასამხედროებული ჯგუფი მონადირე, რომელშიც დაახლოებით 300-400 კაცი შედიოდა 2002 წელს თავდაცვის სამინიტროს დაქვემდებარებაში შევიდა. თუმცა, 2005 წელს თავდაცვის მინისტრმა ირაკლი ოქრუაშვილმა დაშალა, რამაც კოდორის ხეობის ადგილობრივი მოსახლეობის უკმაყოფილება გამოიწვია.

2006 წლის ივლისში კოდორის ხეობაში სპეცოპერაცია ჩატარდა. კვიციანმა რამდენიმე ახლო პირთან ერთად გაქცევა მოახერხა.

2014 წელს ემზარ კვიციანი მოსკოვიდან დაბრუნდა საქართველოში და თბილისის საერთაშორისო აეროპორტი დააკავეს და 12-წლიანი თავისუფლების აღკვეთა მიუსაჯეს.

2015 წელს, პროკურატურასთან მიღწეული საპროცესო შეთანხმების შემდეგ, ქუთაისის სააპელაციო სასამართლომ კვიციანი პატიმრობიდან გაათავისუფლა.

2015 წლის მარტიდან ემზარ კვიციანი პატრიოტთა ალიანსის წევრია.