ფინეთმა გადაწყვიტა, რომ ყოველთვიური შემოსავალი, რომლითაც მის უმუშევარ მოქალაქეებს ეხმარებოდა, 2019 წლის იანვარში დაასრულოს. გადაწყვეტილება ქვეყნის მთავრობამ მიიღო.

ექსპერიმენტი 2 წლის განმავლობაში გრძელდებოდა და ევროპის მასშტაბით უპრეცედენტო იყო.

პროგრამა 2017 წლის იანვარში ამოქმედდა. 2 000 დაუსაქმებელი ფინელი 25-დან 58 წლამდე ყოველთვიურად გარანტირებულ 560 ევროს იღებდა. ამ შემოსავალმა მათი სხვა სოციალური დახმარება ჩაანაცვლა. თუმცა, თუ ისინი სამსახურს დაიწყებდნენ, ამ თანხას კვლავ მიიღებდნენ.

იდეის მომხრეები აცხადებდნენ, რომ ყოველთვიური შემოსავალი ზრდასრულ უმუშევარ მოქალაქეებში კრიმინალის დონესა და სიღარიბეს შეამცირებდა, თუმცა კრიტიკოსები ამბობდნენ, რომ ექსპერიმენტი ძვირი და არაეფექტიანი იყო.

მსოფლიო ბედნიერების 2018 წლის გაეროს ანგარიშში ფინეთი ყველაზე ბედნიერ ქვეყანად დასახელდა.